Qazaqstanda mektep oqýshylaryna sabaq telearnalar arqyly ótkizilýi múmkin. Bul jaiynda QR Bilim jáne ǵylym ministri Ashat Aimaǵambetov Facebook-paraqshasynda jazdy, dep habarlaidy "Ult aqparat".
«Biz arnaiy jumys tobyn qurdyq. Onyń quramyna qashyqtan bilim berý salasynda jumys isteitin «Bilimland», «DDaryn.online», «Kúndelik», «Univer», «Platonus», «EduPage», BIL, «BTS education», «U-study» jáne «AGS» syndy uiymdardyń ókilderi jáne pedagogter, ádiskerler, mektep direktorlary, direktorlardyń oqý isi jónindegi orynbasarlary jáne JOO prorektorlary endi», - dep atap ótedi ministr.
Onyń atap ótýinshe, bul rette jumys birneshe baǵyt boiynsha júrgizilýde. Máselen, tapsyrmalardy berý, olardyń oryndalýyn tekserý, baǵalaý jáne keri bailanysty qamtamasyz etetin aqparattyq júielerdi engizý qarastyrylyp jatyr. Bilim alýshylar beine-sabaqtarǵa qatysyp, tapsyrmalar alyp, qajet bolǵan jaǵdaida pedagogterdiń óz synybymen onlain-talqylaý, baǵalaý boiynsha nemese videostriming servisterin paidalana alýyn qamtamasyz etetin júielerdi iske qosý da kózdelgen.
«Telearnalar arqyly sabaq ótkizýge daiyndalýdamyz. Onda beine-sabaqtar sabaq kestesine sai kórsetiletin bolady. Bul tetik, ásirese, internet qýaty álsiz jáne qajetti qural-jabdyqtarǵa qatysty qiyndyqtary bar aýyldyq bilim berý uiymdary úshin ózekti. Biz úshin barlyq sabaq orta bilim berýdiń memlekettik jalpyǵa mindetti standartyna sai oqý baǵdarlamasy boiynsha, sabaq kestesine sáikes, tsifrlyq bilim berý resýrstary boiynsha ádistemelik qoldaýmen jáne mýltimedialyq materialdarmen qamtamasyz etilip, ustazdar úshin aldyn ala ázirlengen jospar boiynsha júrgizilgeni mańyzdy. Bastysy, bilim alý tetigi sapaǵa áser etpeýi qajet», - dedi ol.
Ministr pedagogter men oqýshylardyń tsifrlyq saýattylyǵyn damytý qajet ekendigi de basty nazarda turǵanyn aitady. Olar úshin arnaiy kýrstar ótkizilip, nusqaýlyqtar ázirlenetin bolady. Qazirdiń ózinde muǵalimder úshin tsifrlyq resýrstardy paidalaný boiynsha biraz videodárister ázirlendi. Inkliýzivtik bilim berý, jańa tehnologiialardyń qoljetimdiligine qatysty printsipter eskeriletin bolady.
«Internet provaiderleri men bailanys operatorlary boiynsha TsDIAÓM-men birlesip jumys júrgizýdemiz. Osy kezeńde bilim berý resýrstaryn paidalaný barysynda trafik eseptelmegeni durys. Osy másele boiynsha Premer-Ministr tarapynan tiisti tapsyrma berildi jáne qoldaý kórsetildi. Kóptegen iri platformalar óz qyzmetterin tegin usynyp jatyr. Bul jumysymyzdy birshama jeńildetti. Qazirgi ýaqytta «Zoom» strimingtik servisi men «Coursera» dep atalatyn iri platformalardyń biri tegin qyzmet kórsetýde. Sondai-aq «Google Classroom», «Hangout», «Kúndelik», «Moodle» júielerin tegin qoldanýǵa bolady. Sonymen qatar «Bilimland» platformasy óziniń 40 myńnan astam kontentin tegin usyndy«, - dedi Ashat Aimaǵambetov.
Onyń atap ótýinshe, karqyndy jumys júrgizilýde.
«Keide ártúrli tásilder men sheshimderdi qabyldaýdy qajet etedi. Biz 5 sáýirge deiin aqparattyq júielerdi daiyndap úlgerýimiz kerek. Olardy tiisti kontentpen qamtamasyz etip, synap kórýimiz qajet. Sondai-aq, 6 sáýirden bastap qajet bolǵan jaǵdaida jańa formatta sabaq alýǵa beiimdeýge tiispiz. Oqýshylarmen, stýdenttermen, ata-analarmen jáne pedagogtermen birigip qashyqtan oqytýdyń sapaly júiesin qura alatyndyǵymyzǵa senimdimin. Eń bastysy, biz árdaiym keri bailanysty, usynystar men tyń ideialardy qýana qabyldaýǵa daiynbyz», - dedi ol.
