Májilis depýtaty Omarhan Óksikbaev jaýapty adamdardan qarjy ministrligine tsifrlandyrýǵa bólingen qarjynyń qaida jumsalǵanyn suraýdy usyndy, dep habarlaidy Sputnik Qazaqstan tilshisi.
Depýtattyń aitýynsha, qarjy ministrligine tsifrlandyrý úshin memleketten orasan zor qarjy bólingen. Alaida atqarylmaǵan is áli de kóp.
"1999 jyldan 2018 jylǵa deiin qarjy ministrligine, onyń keden, qazynashylyq, salyq organdaryn tsifrlandyrý úshin respýblikalyq biýdjettiń ǵana ózinen 78,5 milliard teńge bólingen. Ony dollarǵa shaqqanda jarty milliard dollar. Bul aqshaǵa avtomattandyrýdy ǵana emes, basqa da alǵy sheptiń barlyǵyn engizýge bolatyn shyǵar dep oilaimyn. Al búgin ministrdiń sózine qaraǵanda istelmegen jumys áli bastan asady. Sonda osy aqshanyń bári qaida ketti? Ne engizdik sonda? Búgingi baiandalǵan osy deńgei sol qarjyǵa turarlyq dúnie me?", — dep ashýlandy Óksikbaev májilistegi úkimet saǵatynda.
Májilismen memleketten bólingen qarjynyń qaida jumsalǵanyn tekserýdi usyndy.
"Osyny tekseretin kez kelgen siiaqty. Jaýapty adamdardan jaýabyn suraýymyz kerek", — dedi ol.
Depýtat óńirlerge saparmen barǵan kezde, salyq organdarynyń ǵimaratty keńeitip, salyq tóleýshilerdi qabyldaityn bólmeler jasaýmen álek bolyp júrgenin aitty.
"Ainalaiyn-aý, damyǵan memleketterde salyq tóleýshi salyq organynyń qaida ekenin bilmeidi. Salyq organynyń esigin ashpaidy da, biz soǵan umtylýymyz kerek. Soǵan jetýimiz kerek. Nege biz ǵimaratty keńeitip, azamattardy qabyldaityn organ jasaimyz? Ol orynnyń keregi de joq, salyq tóleýshi men salyq organynyń qarym-qatynasy elektrondy júiede, qashyqtyqta júzege asyrylýy kerek", — deidi Óksikbaev.
Ol Esil aýdanynyń salyq organyna barǵan kezde, ózi kýá bolǵan kórinisti baiandap berdi.
"Salyq tóleýshilerdiń salyq organynda qara ter bolyp júgirip, esep beretin ýaqytynda baryp kórińizshi. Men ózim Esil aýdanynyń salyq organynda bir ret boldym. Sol jerde tentirep júrgen adamdardy kóresiz. Jemqorlyq degen sol jerde jatyr. Osynyń bárin jabatyn kezimiz kelgen siiaqty", — dedi májilis depýtaty.
Sondai-aq, Óksikbaev úkimettik organdar arasynda túsinbeýshilik bar ekenin atap ótti.
"Ótken joly aqparat ministrimiz Qazaqstandy internetpen tolyq tek 2025 jyly ǵana qamtamasyz etemiz dep aitty. Olai bolsa, sizder qalai jalpylama deklaratsiiaǵa kóshe alasyzdar? Kóshe almaisyzdar, sebebi internet joq. Úkimettik organdar arasynda tolyq kelisimmen, zańdy túrde iske asatyn tetikterdiń barlyǵy jasalmaǵan siiaqty, men osyǵan kóńil aýdarǵym keledi", — dedi ol.
