«Ulttyq aqparattyq tehnologiialar» AQ basqarma tóraǵasynyń orynbasary Dáýlet Bekmanov Qazaqstanda tehnikalyq baiqaý ortalyqtaryna qoiylatyn talaptar kúsheigenin málim etti, dep habarlaidy QazAqparat.
«Elimizdegi tehnikalyq baiqaý ortalyqtarynyń jumysyn qamtityn baǵdarlamanyń talaptaryn osy jyldyń shildesinde bekitken edik. Al negizi bul talap 2017 jyly engizilgen. Áitse de, tehnikalyq baiqaý ortalyqtary ol talaptardy eskermei keldi. Basty talap – kólik tehnikalyq baiqaý ortalyǵyna kirgen kezde-aq barlyq málimet avtomatty túrde júiege engizilýi tiis. Osy talapqa sai keletin baǵdarlama boiynsha jumys isteitin 160 ortalyqtyń júiege kiretin kilti qaitaryp alyndy. Olar endi baǵdarlamalaryn jetildirip, qaita jumysqa kirisýi tiis», - dedi Dáýlet Bekmanov elordada ótken baspasóz máslihatynda.
Onyń aitýyna qaraǵanda, tehnikalyq baiqaý ortalyqtary bes túrli baǵdarlama boiynsha jumys júrgizeli. Sonyń úsheýi ǵana tekserýden ótkeni habarlanyp otyr.
«Al kóliktiń memlekettik tirkeý nómirin anyqtai almaityn júiesi bar 2 reseilik baǵdarlama tekserýden ótpedi. Baǵdarlamany jasaǵan kompaniia anyqtalǵan kemshilikterdi joiýdy ýáde etip otyr. Qosymsha tekserýden keiin ol baǵdarlama da júiege engizilýi múmkin», - dedi ol.
Al QR IIDM Kólik komiteti tóraǵasynyń orynbasary Daniiar Qospabaevtyń aitýynsha, Qazaqstanda quramynda myńǵa tarta tehnikalyq baiqaý ortalyǵy bar 645 operator jumys isteidi.
«Jyl saiyn tehnikalyq baiqaýdan 2 mln kóliktiń 1,8 milliony ótedi. Iaǵni, kólikterdiń 5 paiyzy ótpei qalyp jatyr», - dedi ol.
