Almaty oblysynyń Tekeli qalasyndaǵy apatty úilerdiń de máselesi kezeń-kezeńmen sheshiledi, dep habarlaidy QazAqparat.
Tóle bi kóshesindegi apatty dep tanylǵan birneshe úidiń turǵyndary qaladaǵy basqa páterlerge kóshirilip, súrilgen qujyralardyń ornyna kópqabatty úiler salynady.
Bul týraly Qanat Bozymbaev osy apatty úilerdiń turǵyndarymen kezdesýinde aitty.
«Aldymen turýǵa asa qaýipti degen úilerden bastaiyq. Sol úilerdiń turǵyndaryna qalada satylatyn páterlerden baspana alyp beriledi. Al súrilgen úilerdiń ornyna kópqabatty tiptik úlgidegi turǵyn úiler salý kerek. Shamamen eki jyldyń ishinde apatty úilerdiń máselesi tolyq sheshiledi», - dedi ol turǵyndarmen áńgime barysynda.
Esterińizge sala keteiik, byltyr mamyr aiynda Tekeli qalasyndaǵy apatty úilerdiń biriniń tóbesi ortasyna túsken bolatyn.
Sol kezde ákimdik ókilderi 2020 jyldan beri osy úilerdi súrý máselesin kóterip, biýdjetke qarajat bólinýge suranym jiberilgenin, biraq aqsha bólinbei jatqanyn jetkizgen bolatyn.
