Tegin dári-dármek pen meditsinalyq maqsattaǵy buiymdardy berý barysyn baqylaý maqsatynda qolǵa alynǵan nobaily jobanyń alǵashqy nátijeleri belgili boldy.
Ótken jyldyń sońynda Densaýlyq saqtaý ministrligi, MSQ men «SQ-Farmatsiia» JShS birlesip SMS-habarlama júiesin iske qosqan bolatyn. Atap aitqanda, 2018 jyldyń qarasha-jeltoqsan ailarynda tegin dári-dármek alǵandar tizimine engen patsientterdiń telefondaryna SMS-habarlama jiberildi. Barlyǵy 191 myń SMS jiberilgen. Habarlamada retseptiniń nómiri men dáriniń berilgen kúni kórsetildi. Preparattar shyn máninde qolyna timegen patsientterge SMS-habarlamaǵa jaýap retinde «0» tsifryn joldaý nemese «SQ-Farmatsiia» JShS-niń 1439 bailanys nómirine qońyraý shalý usynylǵan bolatyn.
SMS-habarlama qorytyndysy boiynsha, Qorǵa 2 881 patsientten jaýap keldi. Onyń ishinde 441 patsienttiń dári-dármek almaǵany belgili boldy. Taǵy 32 adam – dispanserlik esepte turmaidy jáne eshqashan tegin dári almaǵan bolsa, 10 adamǵa dári-dármek ishinara berilgen.
Dári-dármek qolǵa timegeni týraly habarlamanyń basym bóligin Atyraý, Qyzylorda, Almaty oblysy, Shyǵys Qazaqstan jáne Batys Qazaqstan oblystary, Almaty jáne Astana qalalarynyń turǵyndary joldaǵan.
Sondai-aq, bul monitoring jazylǵan retseptiler men qolma-qol berilgen dári sany bir-birine sáikes kelmeitin 10 meditsina uiymyn anyqtaýǵa múmkindik berdi. Olardyń qatarynda Shyǵys Qazaqstan oblysyndaǵy Zashita temir jol aýrýhanasy, Óskemen qalasyndaǵy №1 jáne №2 emhanalar, Qaraǵandy qalasyndaǵy №1 emhana, Túrkistan oblysy Keles aýdandyq «Abai» aýrýhanasy, Almatydaǵy №5 qalalyq klinikalyq aýrýhana men №23 emhana, Astanadaǵy «Shipager» otbasylyq densaýlyq ortalyǵy bar.
Esterińizge sala ketsek, Meditsinalyq saqtandyrý qory 2018 jyldyń basynda kepildendirilgen tegin kómek paketi sheńberinde beriletin dári-dármek pen meditsina buiymdaryna aqy tóleý tártibin ózgertken bolatyn. Iaǵni, Qor byltyr dári qolma-qol berilgen jáne «Dári-dármekpen qamtamasyz etý» aqparattyq júiesine engizilgen retseptilerge ǵana aqy tóleýge kóshti. «SMS-habarlamalar júiege patsientterdiń ózderin tartýǵa múmkindik berdi. Nátijesinde aqparattyq júiedegi málimetter men dári-dármekpen naqty qamtamasyz etý kórsetkishi arasynda edáýir alshaqtyq bary anyqtaldy», - dep túsindirdi «Áleýmettik meditsinalyq saqtandyrý qory» KEAQ basqarma tóraǵasynyń m.a. Botagóz Jaqselekova.
«Monitoring nátijesi ókiletti organdardyń tekserýine negiz bolyp otyr. Tekserýdi Farmatsiia komiteti men Densaýlyq saqtaý ministrliginiń Qoǵamdyq densaýlyq saqtaý komiteti júrgizbek. Onyń nátijesi boiynsha qabyldanǵan sheshimder quqyq qorǵaý organdaryna beriledi», - dep qosty B. Jaqselekova.
MSQ respýblikalyq biýdjetten qarjylandyrylatyn tegin meditsinalyq kómek (TMKK) paketiniń jáne jumys berýshiler, azamattar men memleket jarnasy esebinen qarjylandyrylatyn mindetti áleýmettik meditsinalyq saqtandyrý (MÁMS) paketiniń operatory. 2018 jyldan bastap Qor TMKKK paketi sheńberinde kórsetilgen qyzmetter aqysyn tólep keledi. Al, MÁMS paketi boiynsha qyzmet kórsetý 2020 jyly bastalmaq.
