Ál-Farabi atyndaǵy Qazaq ulttyq ýniversitetinde BUU-nyń Turaqty damý maqsattaryna arnalǵan kitap kórmesi ótti. Kórmege QazUÝ oqytýshy-professorlarynyń TDM-nyń 17 baǵytyn qamtyǵan 300 kitaby qoiyldy.
Kórmeni QazUÝ Zań fakýltetiniń memleket jáne quqyq teoriiasy men tarihy, konstitýtsiialyq jáne ákimshilik quqyq kafedrasy men Ál-Farabi kitaphanasy janyndaǵy Farabi oqyrmandar klýby birlesip uiymdastyrdy.
Memleket basshysy Qasym-Jomart Toqaev Ulttyq quryltaidyń úshinshi otyrysynda sóilegen sózinde «Biz, eń aldymen, jastardy kitap oqýǵa baýlýymyz kerek. Sonda jappai kitap oqityn ultqa ainalamyz. Kitapqumarlyq – jaqsy qasiet. Shyn máninde, ozyq oily ult bolýdyń eń tóte joly – kitap oqý. Sondyqtan kitap oqý mádenietin qoǵamda barynsha ornyqtyrýymyz kerek», – dep atap ótken bolatyn.
Búgingi tańda ártúrli elderdegi turaqty damý maqsattaryna arnalǵan kitap klýbtary BUU-nyń bul baǵyttaǵy jumystaryn aýqymdy aýditoriiaǵa, ásirese jastar arasynda keńinen nasihattaýda mańyzdy ról atqarady.
Bul bastamalar TDM-ǵa nazar aýdarý, álemniń syn-qaterlerin qabyldaýǵa daiyn jáne turaqty damýǵa umtylatyn kóshbasshylardyń jańa býynyn tárbieleý baǵytyndaǵy mańyzdy qadamdar bolyp tabylady.
Is-sharaǵa Ál-Farabi atyndaǵy QazUÝ, zań fakýltetiniń Memleket jáne quqyq, konstitýtsiialyq jáne ákimshilik quqyq teoriiasy men tarihy kafedrasynyń meńgerýshisi Qarlyǵash Úseiinova, Pan Gi Mýn atyndaǵy Turaqty damý institýtynyń direktory Jansaia Isaeva, QazUÝ-dyń Ál-Farabi kitaphanasy direktorynyń mindetin atqarýshy Jadyra Aidynǵaliqyzy qatysyp, kórmeniń mańyzdylyǵyn atap ótti.
Kórmeniń maqsaty - jastardyń kitap oqýǵa qyzyǵýshylyǵyn arttyrý, turaqty damý maqsattaryn iske asyrý maqsatynda bilim men tájiribelerin shyńdaý.
Qaragóz SIMÁDIL,
ál-Farabi atyndaǵy QazUÝ-diń
Baspagerlik, redaktorlyq jáne dizainerlik óner kafedrasynyń oqytýshysy
