Grýziia astanasy Tbiliside halyqaralyq izdeýde júrgen qazaqstandyq erli-zaiypty qolǵa tústi. Olar sintetikalyq esirtki óndirisin uiymdastyrdy degen kúdikke ilingen, dep habarlaidy ult.kz.
Qazaqstan men Grýziia Ishki ister ministrlikteri arasyndaǵy birlesken kelissózder men yntymaqtastyq nátijesinde júrgizilgen operatsiia barysynda kúdiktiler ustalǵan. Bul týraly Polisia.kz habarlady.
Tergeý málimetinshe, Qazaqstan azamaty 2023 jyldyń qazan aiynan 2024 jyldyń aqpan aiyna deiin Almaty oblysynda arnaiy jabdyqtalǵan jasyryn zerthanada mefedron óndirisin uiymdastyrǵan. Ol esirtki daiyndaýmen ainalysqan negizgi “himik” bolǵan degen kúdik bar.
Al onyń jubaiy sintetikalyq esirtki óndirisiniń qarjylyq operatsiialaryn júrgizýge qatysqan. Tergeýshilerdiń málimetinshe, áiel Almaty jáne Qaraǵandy oblystaryndaǵy zańsyz esirtki óndirisin qarjylai súiemeldep otyrǵan.
Qazir ustalǵandardy Qazaqstanǵa ekstraditsiialaý máselesi qarastyrylyp jatyr.
Resmi málimet boiynsha, biyl naýryz aiynan beri Grýziia aýmaǵynda Qazaqstan quqyq qorǵaý organdary izdegen 15 adam ustalǵan.
Aita keteiik, buǵan deiin Astanada Qazaqstan men Grýziia IIM basshylary kezdesip, transulttyq qylmys, esirtki ainalymy jáne halyqaralyq izdeýdegi qylmyskerlerge qarsy kúresti kúsheitý jóninde kelisimge kelgen bolatyn.
