Grýziia astanasynda Abai Qunanbaiulyna eskertkish ornatyldy. Onyń ashylý saltanatyna QR Indýstriia jáne infraqurylymdyq damý ministri Qaiyrbek Óskenbaev qatysty, dep habarlaidy QazAqparat vedomstvonyń baspasóz qyzmetine silteme jasap.
Atalǵan is-shara Qazaqstan men Grýziia arasyndaǵy diplomatiialyq qarym-qatynastardyń ornaǵanyna 30 jyl tolýyna orai uiymdastyryldy.
«Bul eki el arasyndaǵy dostyǵymyzdyń taǵy bir nyshany bolary sózsiz. Abai murasy tek bizdiń elimiz úshin ǵana emes, búkil adamzat úshin zor qundylyq bolyp tabylady. 2020 jyly biz Uly Abaidyń 175 jyldyq mereitoiyn atap óttik. Kórsetilgen osynaý qurmet úshin Grýziia Úkimeti men halqyna alǵys aitamyn», – dedi Qaiyrbek Óskenbaev.
Tbilisige jumys saparymen barǵan ministr Grýziianyń vitse-premeri, ekonomika jáne turaqty damý ministri Levan Davitashvilimen kezdesti. Kelissózder barysynda kólik, aqparattyq tehnologiialar jáne innovatsiialar salasyndaǵy saýda-ekonomikalyq yntymaqtastyqty damytý perspektivalary siiaqty mańyzdy máseleler qozǵaldy.
Qaiyrbek Óskenbaevtyń aitýynsha, Qazaqstan men Grýziia arasyndaǵy saýda qatynastaryn ulǵaitýda aitarlyqtai áleýet baiqalady. Ministr búgingi tańda qazaqstandyq kompaniialar metallýrgiia, munai-himiia, tamaq jáne mashina jasaý salalarynda óńdelgen taýarlarynyń Grýziiaǵa eksportyn arttyrýǵa daiyn ekenin atap ótti. Olardyń qatarynda farmatsevtika men qurylys salasy da bar.
Sondai-aq, ministr Grýziianyń Qorǵanys ministri Býrchýladze Djýanshermen kezdesip, saýda-ekonomikalyq yntymaqtastyq jónindegi úkimetaralyq komissiia otyrysynyń jumysyna qatysýdy josparlap otyr.
