Tájikstandy 28 jyldan astam ýaqyt basqaryp otyrǵan 67 jastaǵy Emomali Rahmon 11 qazanda ótetin prezident sailaýyna kandidat retinde túsedi. 26 tamyzda Táýelsiz kásipodaqtar federatsiiasy Rahmondy prezident sailaýyna úmitker retinde usyndy. Federatsiia músheleri sezde onyń kandidatýrasyn biraýyzdan maquldady.
Buǵan deiin Rýstam Latifzoda (Agrarlyq partiia), Abdýhalim Gafforov (Sotsialistik partiia), Saiddjafar Ýsmonzoda (Demokratiialyq partiia) jáne Rýstam Rahmatzoda (Ekonomikalyq reforma partiiasy) kandidat retinde tirkelgen.
Kommýnistik partiia men Halyqtyq-demokratiialyq partiia kandidattary qyrkúiektiń basynda belgili bolýy tiis.
Tájikstannyń sotsialistik-demokratiialyq partiiasy sailaýǵa boikot jariialaýy múmkin. Eki kún buryn partiia lideri Rahmatillo Zoiirov sailaýǵa túspeitinin málimdegen. Ol "Rahmon prezident retinde eshqandai partiiaǵa múshe bolmaýy tiis. Elde kóp partiialy júie qirady, bir partiialy júie qalyptasty" degen. Zoiirov biylǵy sailaýdy "zańsyz, Konstitýtsiiaǵy qarsy" degen.
11 qazanda ótetin saiasi naýqan – táýelsiz Tájikstan tarihyndaǵy altynshy prezident sailaýy. Osyǵan deiingi bes sailaýdyń bárinde Rahmon jeńgen. 2013 jylǵy sailaýda 84 paiyz daýyspen jeńiske jetken.
Ol bilikte 28 jyl otyr. Halyqaralyq uiymdar men sarapshylar Rahmon Tájikstanda bilikti synaýshylardy qýdalap, adam quqyǵyn buzdy, sóz bostandyǵy men dini bostandyqty shektedi dep synaidy. Onyń balalary men jaqyndary biliktegi negizgi qyzmetterde otyr. Uly Rýstam Emomali – elde senat spikeri retinde bilik ierarhiiasyndaǵy ekinshi adam.
Tájikstanda prezident 7 jylǵa sailanady. Daýys berýshilerdiń 50 paiyzy qatysqan sailaý ótti dep esepteledi.
