Tájikstanda Kýliab qalasynyń politsiiasy "jańa jyldyq shyrshany órtemek boldy" jáne "politsiia qyzmetkerine shabýyl jasady" degen kúdikpen Farhod Azizhan esimdi 27 jastaǵy qala turǵynyn ustady. Jergilikti politsiiadaǵy derekkóz Azattyqtyń Tájik qyzmetine oqiǵanyń 23 jeltoqsanda bolǵanyn aitqan.
Aty-jónin aitpaǵan politsiia qyzmetkeriniń sózine qaraǵanda politsiia Azizhandy qaladaǵy alańda "jańa jyldyq shyrshaǵa benzin shashyp jatqan kezde" ustaǵan. Onyń aitýynsha, kúdikti ózin ustaýǵa tyrysqan politsiia qyzmetkerine de shabýyl jasap, aqyrynda politseiler ony ustap áketken. Derekkóz oqiǵa kezinde eshkimniń zardap shekpegenin aitty.
Azattyqtyń Tájik qyzmeti bul aqparatty táýelsiz derekkózderinen rastai almaǵan. Azizhannyń týystary túsinikteme bermegen.
Kýliab qalalyq politsiiasy Azizhannyń ustalǵanyn rastaǵanmen ony ustaý sebebin túsindirmedy. Ozodi radiosynyń habarlaýynsha, Charmgaroni Poion aýylynyń turǵyny buryn esirtki saýdasy boiynsha aiyptalyp, bir jyl buryn túrmeden bosap shyqqan. Qupiia derekkóziniń aitýynsha, politsiia oqiǵaǵa bailanysty is qozǵaǵan.
