Tájikstanda koronavirýsqa bailanysty túrli sybys tarap, turǵyndar jappai azyq-túlik satyp ala bastaǵan soń bilik elde azyq-túlik qory jetkilikti dep málimdeme jasaýǵa májbúr boldy. Osyndai "ajiotajdyń" saldarynan keibir azyq-túlik túrleri qymbattap, dúken sóreleri bosai bastaǵan. 5 naýryzda densaýlyq saqtaý ministrligi jáne halyqty áleýmettik qorǵaý ministrligi "azyq-túlik qory jetkilikti, toǵyz million halyqty asyraý úshin áli eki jylǵa jetedi" dep málimdedi.
Al ekonomika jáne saýda ministrligi turǵyndardy "azyq-túlik tapshylyǵy týraly alyp-qashpa áńgimelerge senbeýge" shaqyrdy.
Buǵan deiin bilik koronavirýsqa bailanysty meshitterde jinalyp, namaz oqýǵa shekteý qoiǵan. Bilik sonymen birge Dýshanbede jyl saiynǵy Naýryz merekesin toilaýdy da keiinge shegergen. Sybystyń taralýyna osy jaittar túrtki bolǵan. Elde resmi túrde koronavirýs tabylmaǵan.
Tájikstan COVID-19 aýrýynyń taralý oshaǵy Qytaimen shekaralasady. Álem boiynsha koronavirýstan úsh myńnan astam adam qaitys bolǵan, virýs juqtyrǵandar sany 92 myńnan asqan. Virýs álemniń 60-tan astam eline taraǵan.
