Qyrǵyzstannyń Syrtqy ister ministrligi 18 qyrkúiekte keshke Tájikstanmen shekaradaǵy jaǵdaiǵa qatysty málimdeme jasady, - dep habarlaidy Tengrinews.kz agenttigi AKIpress basylymyna silteme jasap.
Vedomstvo tájik tarapynyń áreketin "Qyrǵyzstannyń aýmaqtyq tutastyǵy men egemendigine qolsuǵý" dep baǵalady.
"Qyrǵyz Respýblikasynyń Syrtqy ister ministrligi 2022 jylǵy 14-17 qyrkúiekte óz egemendi aýmaǵynda bolǵan oqiǵalardy Tájikstan Respýblikasynyń elge qarsy aldyn ala josparlanǵan qarýly agressiia áreketi retinde qarastyratynyn málimdeý qajet dep sanaidy.
Tájik tarapynyń adamgershilikke jatpaityn áreketteri saldarynan 2022 jyldyń 18 qyrkúiegindegi jaǵdai boiynsha Qyrǵyz Respýblikasynyń 46 azamaty qaza taýyp, 140-y jaralanǵan. 140 myńǵa jýyq adam evakýatsiiaǵa májbúr boldy. Orasan zor materialdyq shyǵyn keltirildi.
Tájik tarapynyń "Tájikstan Respýblikasyna qarsy qarýly agressiia jasady" degen negizsiz aiyptaýy jaýapkershilik pen kináni Qyrǵyz Respýblikasyna artý áreketi dep esepteimiz. Tájik tarapy Qyrǵyz Respýblikasynyń qorǵanys is-áreketine nuqsan keltirýge baǵyttalǵan keń aýqymdy jalǵan aqparat taratý naýqanyn bastady.
Tájikstan Respýblikasynyń Syrtqy ister ministrligi men basqa da quzyrly organdarynyń aqparaty shyndyqqa sáikes kelmeitinin jaýapkershilikpen málimdeimiz. Qyrǵyz tarapynda agressiianyń basy jazylǵan barlyq dálelder (foto jáne beinematerialdar), sondai-aq Tájikstan áskerileriniń Qyrǵyz Respýblikasy aýmaǵynda jasaǵan barlyq buzaqylyǵy men qylmystary bar. Qajet bolsa, qyrǵyz tarapy bul dáleldi berýge daiyn.
Tájikstan Respýblikasy aýmaqtyq tutastyq, memlekettik shekaralardyń myzǵymastyǵy, halyqaralyq daýlardy beibit jolmen sheshý, kúsh qoldanbaý jáne kúsh qoldanýmen qorqytpaý, sondai-aq BUU Jarǵysynda jáne basqa da halyqaralyq qujattarda bekitilgen Adam quqyqtary men bostandyqtaryn qurmetteý siiaqty negizgi halyqaralyq qaǵidattardy óreskel buzdy.
Qyrǵyz Respýblikasy Qyrǵyzstannyń aýmaqtyq tutastyǵy men egemendigine opasyzdyqpen qolsuqqan tájik tarapyna qaraǵanda, sheteldiń territoriiasyn basyp alýdy maqsat etpei, tek qorǵanys pozitsiiasynan áreket etti, bul Tájikstannyń aýmaqtyq talaptary bar ekenin taǵy bir ret rastaidy. Qyrǵyz tarapy tájik tarapynan Qyrǵyz Respýblikasynyń aýmaǵyna qolsuǵýdyń perspektivasyz josparlarynan jáne shekaralyq aimaqtaǵy jaǵdaidy ýshyqtyrý jónindegi kózdegen maqsattarynan bas tartýdy talap etedi. (...)
Birneshe ret atysty toqtatý týraly kelisimderge qaramastan, tájik tarapy arandatýshylyqpen atqylaýyn jalǵastyryp, Qyrǵyz Respýblikasynyń Batken oblysyndaǵy Dostýk, Aqsai, Internatsional, Jashtyk, Borbordýk, Arka, Kýlýndý... siiaqty keibir eldi mekenderdi basyp alǵanyn atap ótemiz.
Tájik tarapynyń áreketi aýqymdy memleketaralyq qaqtyǵystyń tutanýyna, sondai-aq jalpy Ortalyq Aziia aimaǵyndaǵy jaǵdaidyń turaqsyzdanýyna ákelýi múmkin. Onyń ústine, tájik tarapy týdyrǵan jaǵdai qazirdiń ózinde beibit turǵyndardyń, áskeri qyzmetkerlerdiń shyǵynǵa ushyraýyna, áskeri jáne azamattyq infraqurylymǵa, jergilikti turǵyndardyń densaýlyǵy men múlkine eleýli zalal keltirdi.
Qyrǵyz Respýblikasynyń Syrtqy ister ministrligi eki el arasyndaǵy daýlardy tek qana beibit jolmen jáne kelissóz ústelinde saiasi-diplomatiialyq ádistermen sheshý qajettigi týraly óziniń ózgermeitin ustanymyn rastaidy", - delingen Qyrǵyzstan Syrtqy ister ministrligi habarlamasynda.
Osy kúni tańerteń Tájikstan Syrtqy ister ministrligi Qyrǵyzstanmen shekarada qarýly qaqtyǵys bastalǵannan beri alǵash ret oqiǵalar hronologiiasyn egjei-tegjeili sipattaityn habarlama jariialady. Atap aitqanda, vedomstvo kórshi eldi "qarýly agressiia aktisin uiymdastyrdy" jáne "búkil shekara syzyǵy boiynsha oq jaýdyrdy" dep aiyptady.
Tájikstan Syrtqy ister ministrligi qaqtyǵysty Qyrǵyzstannyń Ulttyq qaýipsizdik memlekettik komitetiniń shekara áskerleri bastaǵanyn, olar Qyrǵyzstan qarýly kúshteriniń basqa quramalary qoldaýymen 14 qyrkúiek saǵat 07:15-te "esh sebepsiz Tájikstanǵa qarsy qarýly agressiia áreketin jasaǵanyn" málimdep otyr.
Ministrlik qaqtyǵys kezinde kem degende 30 beibit turǵyn men eki tájik sarbazy qaza tapqanyn habarlady.
Qyrǵyzstanda 18 qyrkúiekte saǵat 22:00-degi jaǵdai boiynsha, Tájikstanmen shekaradaǵy qarýly qaqtyǵys saldarynan qaza tapqandardyń jalpy sany 59 adam bolǵan, 144 adam jaraqat alǵan.
