Qyrǵyzstan men Tájikstan arasyndaǵy shekaralyq janjal qanshalyqty qaýipti jáne bolǵan jaitqa qatysty Qazaqstannyń ustanymy qandai? Atalǵan suraqtarǵa qatysty QR Syrtqy ister ministrligi janyndaǵy syrtqy saiasi zertteýler institýtynyń basqarma tóraǵasy Bolat Nurǵaliev pikir bildirdi, dep habarlaidy QazAqparat.
«Meniń pikirim, bul turmystyq janjal. Odan shý shyǵarýdyń qajeti joq. Bul soǵys emes. Ózara kelispeýshilik birneshe saǵatqa ǵana sozyldy. Onyń ústine ekijaq oq atyspaý jóninde kelisimge keldi. Bul ishki másele, sondyqtan syrttan aralasýdyń qajeti joq. Atalǵan janjal memleketaralyq qarym-qatynasqa esh áser etpeidi. Bizde de bolady ǵoi, kórshi eki aýyl ózara kelispei qalady, sol sekildi. Árine, tájik-qyrǵyz shekarasynda ne bolyp jatqanyn bilmeimin, óz kózimmen kórgen joqpyn», - dedi Bolat Nurǵaliev.
Onyń aitýynsha, atalǵan másele eki arasynda ózara sheshilýi tiis. Iaǵni syrt kúshtiń aralaspaǵany jón.
«Kez kelgen janjaldy sheshýdiń eki joly bar. Birinshi, beibit jolmen sheshý, iaǵni ymyraǵa kelý. Ekinshi joly, ókinishke qarai, qanǵa qan. Degenmen kórip otyrǵanymyzdai, tájik-qyrǵyz aǵaiyn ózara kelisimge kelip, oq atýdy toqtatty. Taǵy bir eskeretin jait, janjal kútpegen jerden bolýy múmkin. Sondyqtan onyń qashan, kimniń arasynda bolatynyn eshkim aldyn ala aita almaidy. Bastysy sabyrǵa, kelisimge kelý kerek. Árine, bizdiń el tájik-qyrǵyz janjalynyń beibit jolmen sheshilýin qoldaidy jáne eki elge birdei tatýlyq tileimiz», - deidi ol.
Sondai-aq institýt basshysy elde bolǵan jappai tártipsizdikter kezinde atalǵan eki elde Qazaqstanǵa qoldaý bildirgenin aitty.
