Izrail men Palestinanyń HAMAS áskeri tobynyń arasyndaǵy soǵysty toqtatý osy juma kúni óz kúshine enýi múmkin, dep habarlaidy The Wall Street Journal basylymy.
Basylym málimetinshe, Mysyr biligi HAMAS basshylyǵymen kelisimge kelgen, al izraildik áskeriler óz maqsattaryna jetýge jaqyndap qalǵanyn moiyndady.
AQSh resmi ókiliniń málimdeýinshe, prezident Djo Baidenniń ákimshiligi qaqtyǵystardyń osy aptada aiaqtalyp, tatýlastyq ornaitynyn kútip otyr. AQSh Mysyr, Katar jáne Eýropanyń birneshe elimen birlesip Gazadaǵy áskeri is-qimyldardy toqtatý úshin barlyq sharalardy qabyldaýda
AQSh-tyń resmi ókili oq jaýdyrýdy toqtatý mehanizmi bar ekenin málimdep, jalǵyz problema – ýaqyt ekenin aitty. Bul rette ol basqa áskeri top músheleri – Palestinalyq islam djihadynyń aldyn ala boljamsyz faktor ekenin atap ótti. Bul toptyń taraptar oq jaýdyrýdy tolyq toqtatý týraly kelisýshilikke qol jetkizgen soń jaǵdaidy ýshyqtyrýy (provakatsiialaý) múmkin degen alańdaýshylyq bar. Aq úi túsinikteme berýden bas tartty.
AQSh prezidenti Djo Baiden sársenbi kúni premer-ministr Netaniahýmen telefon arqyly áńgimelesý kezinde «oq jaýdyrýdy toqtatý jolynda aitarlyqtai deeskalatsiia kútip otyrǵanyn» jetkizdi. Bul - eki el kóshbasshylary arasynda bir aptanyń ishinde bolǵan tórtinshi telefon arqyly áńgimelesýi.
Aita ketsek, Palestina toptary men izraildik áskerdiń bir-birine oq jaýdyrý 10 mamyrda bastaldy. Palestina Densaýlyq saqtaý ministrliginiń málimetinshe, qaza bolǵandar sany 250 adamnan asqan, sonyń ishinde 227 adam Gaza sektorynda kóz jumǵan. 250 adamnyń 60-y – balalar. Izraildik taraptan kem degende 12 adam qaza tapty.
