© Sputnik / Pavel Lisitsyn
Ekologiia, geologiia jáne tabiǵi resýrstar ministri Serikqali Brekeshev taiaý bolashaqta kóptegen ken orny sarqylýy múmkin ekenin aitty, dep habarlaidy Sputnik Qazaqstan.
Ministr paidaly qazbalardyń kóptegen túriniń rastalǵan qory boiynsha Qazaqstan álemniń jetekshi elderiniń alǵashqy ondyǵyna kiretinin atap ótti.
"Bul rette paidaly qazbalardy qarqyndy óndirýge bailanysty geologiia salasynyń aldynda turǵan basty syn-qateri – qorlardyń tolyqtyrý deńgeiiniń tómendigi. Óndirýdiń qazirgi deńgeiin alatyn bolsaq, tiisti tolyqtyrýsyz kóptegen igeriletin ken ornynyń qorlary taiaý bolashaqta taýsylady", - dedi Brekeshev Úkimet otyrysynda.
Máselen, 2025-2040 jyldarǵa qarai Shyǵys Qazaqstanda qala quraýshy jáne óńir ekonomikasyna áser etetin Orlov, Maleev, Tishin, Ridder-Sokolnoe siiaqty iri ken oryndary taýsylady degen boljam bar. Osyǵan bailanysty jer qoinaýyn memlekettik geologiialyq zertteýdi jandandyrý talap etiledi.
Ministrdiń aitýynsha, 2020-2022 jyldary memleketten quiylǵan qarjy kólemi 30 milliard teńgeni quraǵan. Sońǵy jyldary memlekettik investitsiialardyń ulǵaiǵany baiqalýda.
Biraq Qazaqstanda bir sharshy shaqyrymǵa geologiialyq barlaýǵa salynatyn memlekettik investitsiia tómen. Ol nebári 11 dollar. Al máselen Avstraliiada – 167 dollar, Kanadada – 203 dollar.
Brekeshev geologiialyq zertteýdi arttyrý jáne perspektivaly ýchaskelerdi anyqtaý qajet ekenin atap ótti. Sonymen qatar óndiristik-tehnologiialyq protsesterdi tsifrlandyrý jáne avtomattandyrý kerek.
Geologiialyq zertteýdiń investitsiialyq tartymdylyǵyn arttyrý, mineraldyq-shikizat bazasyn molaitý úshin zańnamany jetildirý talap etiledi.
Ekologiia ministrligi geologiia salasyn damytýdyń 2025 jylǵa deiingi tujyrymdamasynyń jobasyn ázirlegen. Qujatta osy máselelerdiń sheshimi kórinis tapty.
