Elordadaǵy Ázerbaijan elshiligi Taýly Qarabaqtaǵy ahýalǵa bailanysty jýrnalisterge arnaiy brifing ótkizdi, dep habarlaidy "Ult aqparat".
«Taýly Qarabaqtaǵy jaǵdai - óte názik másele. Sondyqtan da shielenis birneshe jyldan beri jalǵasyp kele jatyr. Osy oraida Ujymdyq qaýipsizdik týraly shart uiymyna múshe Qazaqstannyń Ázerbaijan eline moraldyq qoldaý kórsetýin suraimyz. Ázerbaijan ózge memleketterden áskeri nemese basqa da kómek kórsetýin ótinbeidi», - dedi Ázerbaijannyń Qazaqstandaǵy Tótenshe jáne Ókiletti Elshisi Rashad Mamedov.
Sondai-aq, Rashad Mamedov brifing barysynda sheteldik BAQ-tyń resmi aqparatqa sai kelmeitin málimetterdi jariialap jatqanyn aitty.
«Búginde aqparat portaldarynda eki el arasyndaǵy ahýal týraly beiresmi málimetter kóbeiip keledi. Jýrnalister Ázerbaijan nemese Armeniia eliniń resmi aqparat portaldarynan emes, derekterdi úshinshi eldiń BAQ betterinen alyp jatyr. Sondyqtan qalam ustaǵan qaýymnan tek resmi aqparatqa súiene otyryp, halyqty durys málimetpen qamtamasyz etýdi suraimyn. Bul - óte mańyzdy. Muny Ázerbaijan Prezidenti taiaýda ótken BUU-nyń 75-shi sessiiasynda da atap ótken bolatyn. Biz soǵysty qalamaimyz. Degenmen bizge tiesili aýmaq óz menshigimizde qalýy tiis» , - dep atap ótti Ázerbaijannyń Qazaqstandaǵy Tótenshe jáne Ókiletti Elshisi Rashad Mamedov.
Eske sala keteiik, Ázerbaijan men Armeniia arasyndaǵy qaqtyǵys 27 qyrkúiekte bastalǵan bolatyn.
