Ózin respýblika dep jariialap alǵan Taýly Qarabaq biligi orys tilin armian tilimen qatar ekinshi resmi til etý týraly usynysty maquldady, dep habarlaidy Azattyq.
Til týraly túzetýler 25 naýryzda qabyldandy.
Zań jobasynda orys tiline resmi mártebe berý Taýly Qarabaqtyń Reseimen "mádeni, áskeri jáne ekonomikalyq bailanysyn tereńdete túsedi" dep jazylǵan. Oǵan aimaq basshysy Araik Arýtiýnian qol qoiǵannan keiin joba zańǵa ainalady.
Aimaqtyń zań shyǵarý organyndaǵy bes partiianyń úsheýi ótken aida osyndai usynys jasaǵan. Olar bul reseilik soldattar men osy aimaqqa shoǵyrlanǵan gýmanitarlyq qyzmetkerlermen qarym-qatynas jasaýdy jeńildetedi dep aitqan edi.
Byltyr qarasha aiynda Taýly Qarabaqta alty aptaǵa sozylǵan soǵystan keiin Máskeýdiń araaǵaiyndyq etýimen atysty toqtatý týraly kelisimge qol qoiyldy. Sarapshylar bul kelisim Reseidiń aimaqtaǵy yqpalyn kúrt arttyryp jibergenin aitady. Qaqtyǵys kezinde 6 myńnan astam adam qaza bolǵan.
Kelisimge sáikes, Taýly Qarabaqtyń bir bóligi jáne 30 jyl boiy armiandar baqylaýynda bolǵan sol mańdaǵy jeti aýdan Ázerbaijanǵa qaitaryldy. Buǵan qosa, aimaqqa shamamen 2 myń reseilik bitimger soldat ornalastyryldy.
Baký aimaqta orys tiline resmi mártebe berý týraly jospardy synady. Prezident Ilham Áliev 26 aqpanda "Ázerbaijanda bir ǵana resmi til bolýy múmkin", bul – ázerbaijan tili dep málimdegen.
TASS agenttiginiń jazýynsha, Kreml bul máseleni Ázerbaijan men Armeniianyń "ishki isi" dep ataǵan.
Halyqaralyq deńgeide Taýly Qarabaq Ázerbaijan jeri sanalady. Daýdyń basy SSSR-diń ydyraý aldynda bastaldy. Sovet odaǵy kezinde turǵyndarynyń kóbi etnikalyq armian bolǵan aýmaq Ázerbaijannyń qaramaǵynda bolǵan.
1988 jyly Taýly Qarabaqtaǵy armiandar Ázerbaijannan bólinetinin málimdep, onyń arty alty jylǵa sozylǵan soǵysqa ulasty. Soǵys 1994 jyly aiaqtalyp, onyń nátijesi boiynsha Taýly Qarabaq Erevan qoldaýyna ie etnikalyq armiandardyń baqylaýynda qaldy.
Osy daýdy sheshý úshin EQYU aiasynda Minsk toby qurylǵan edi. Oǵan Resei, Frantsiia jáne AQSh elderi qatysty. Alaida Minsk toby taraptardy qanaǵattandyratyn nátije bermedi.
2020 jyly qarashadaǵy Máskeýdiń aralasýymen bolǵan kelisimnen soń Taýly Qarabaq jeri bylai bólindi:
