Taýly Qarabaqqa reseilik bitimger sarbazdar mingen alty Il-76 ushaǵy qondy. Bul aqparatty Resei qorǵanys ministrligi habarlady. Aimaqqa 1 960 sarbaz jáne 470 tehnika jetkizilýi tiis.
9 qarashada áleýmettik jelide Reseidiń Ýlianovsk qalasyndaǵy "Vostochnyi" áýejaiynan túsirilgen spýtnik sýretteri taraǵan bolatyn. Onda ushýǵa daiyndalyp jatqan on shaqty Il-76 ushaǵy kórinedi.
Reseilik bitimger kontingentiniń deni Samara oblysyna dislokatsiia jasalǵan 15-jeke motoatqysh brigadasy múshelerinen quralǵan. 2008 jyly atalǵan brigada grýzin-abhaz qarýly qaqtyǵysy aimaǵynda birqatar tapsyrmalar oryndaǵan.
Ázerbaijan prezidenti Ilham Álievtiń aitýynsha, Reseidiń bitimger sarbazdary Túrkiia áskerilerimen birigip áreket etedi, alaida dúisenbi kúni kelisilgen qujatta bul jaǵy kórsetilmegen.
Dúisenbi kúni keshke Resei, Ázerbaijan basshylary jáne Armeniia premer-ministri 10 qarashaǵa qaraǵan túni Taýly Qarabaqta áskeri qimyldy toqtatý týraly ortaq málimdemege qol qoiǵan. Biraq taraptar ózderiniń pozitsiialarynan jyljymaǵan.
Kelisimge sáikes, armian taraby 20 qarashaǵa deiin Ázerbaijanǵa Agdam, Kelbadjar, Lachin aýdandaryn qaitarýy tiis. Biraq Taýly Qarabaqpen bailanysyn úzbeý úshin Lachin dálizin (eni 5 km) saqtap qalady.
Reseilik sarbazdar Taýly Qarabaqpen túiisken tusta jáne Lachin dálizi mańynda ornalasady. Bitimgerlik kontingenttiń sol aimaqta qalý merzimi 5 jyl jáne ahýal turaqtamasa taǵy bes jylǵa sozylady.
Taýly Qarabaq resmi túrde Ázerbaijan aýmaǵy sanalady, biraq bul aimaqta etnikalyq armiandar turady. Taýly Qarabaqtaǵy armiandardy Erevan qoldap otyr. Ázerbaijan men Armeniia Taýly Qarabaq aimaǵy úshin 1988 jyldan beri qaqtyǵysyp keledi. 1988-94 jyldary arasyndaǵy soǵysta 30 myńdai adam qaitys boldy. 1994 jyly eki el qaqtyǵysty toqtatý týraly kelisimge qol qoiǵan. Sol ýaqyttan beri Taýly Qarabaq etnikalyq armiandardyń baqylaýynda. Taýly Qarabaq aimaǵy 1991 jyly táýelsizdik jariialap alǵan. Biraq olardy Armeniiadan basqa eshbir el moiyndamady.
Biyl 27 qyrkúiekte Taýly Qarabaq úshin qaqtyǵys qaita bastalyp, myńdaǵan adam qaitys boldy. Olardyń arasynda beibit turǵyndar da bar. Eki tarap úsh ret atysty toqtatý týraly kelisimge kelgenimen, bul kelisim saqtalmady.
Taýly Qarabaqtyń de-fakto úkimeti qyrkúiekten beri 1221 áskeri qaitys bolǵanyn málimdedi. Ázerbaijan soǵystan qansha sarbaz qaza tapqanyn aitpai otyr.
