Tájikstan ishki ister ministrliginiń habarlaýynsha, 18 mamyrda Taýly Badahshan avtonomiialy oblysynyń Rýshan aýdanyndaǵy "terrorizmmen kúres operatsiiasynda" toǵyz adam qaza bolyp, 11 adam jaralandy. Narazylyq aktsiiasyna qatysqan 70-ten astam adam ustaldy, dep habarlaidy Azattyq.
Qaza tapqandardy, jaralanǵandar men ustalǵandardy quqyq qorǵaý organdary "terroristik toptyń belsendi músheleri" dep atady.
Taýly Badahshanda bailanys pen internet óshkendikten aqparatty táýelsiz derekkózder kómegimen tekserý múmkin bolmai otyr.
Munyń aldynda Ishki ister ministrligi Rýshan aýdanynda sársenbi kúni tańerteń úkimet kúshteri men Horogqa aparatyn joldy bógegen turǵyndar arasynda qaqtyǵys bolǵanyn rastaǵan.
Aimaqta bailanys pen internet óshirilgenge deiin jergilikti turǵyndar Ozodi radiosyna narazylyq aktsiiasyna shyqqandarda qarý bolmaǵanyn, beibit turǵyndar qaza tapqanyn habarlap úlgergen. Alaida Tájikstan ishki ister ministrligi "uiymdasqan qylmystyq top múshelerinen" kóptegen qarý-jaraq, "Molotov kokteilderi" tartyp alyndy dep málimdegen.
"200 adamnan turatyn uiymdasqan qylmystyq toptar Rýshan aýdanynyń ortalyǵynda qarýdyń barlyq túrin qoldanyp, Dýshanbe - Horog avtojolyn úsh jerden jáne shekara komendatýrasyna aparatyn joldy japty. Oblys prokýratýrasy soǵan bailanysty qylmystyq is qozǵady, tergeý júrip jatyr", delingen Tájikstan IIM baspasóz qyzmetiniń 18 mamyrda taratqan habarlamasynda.
Kýágerler bolsa jergilikti jastar toby Horogqa qarai bettegen áskeri tehnikanyń qozǵalysyna bóget jasaýǵa talpyndy dep otyr. Olardyń qolynda qarý bolmaǵan, deidi jergilikti turǵyndar.
Ishki ister ministrligi "qylmystyq toptar osy áreketke aldyn ala daiyndalyp, qarý-jaraqty shetelden aldyrǵan" dep habarlady. Bul toptarǵa kimder kiretini, olar qarýdy Taýly Badahshanǵa qaidan jáne qalai jetkizgeni týraly eshteńe aitylmaǵan.
Buǵan qosa, ministrlik "jergilikti uiymdasqan qylmystyq top múshelerin halyqaralyq ekstremistik jáne terroristik uiymdar qarjylandyrǵan, olar memleket qaýipsizdigin buzýdy, konstitýtsiialyq qurylymǵa syzat túsirýdi kózdegen" dep esepteidi. Shabýyldan bir ofitser qaza bolyp, 13 soldat aýyr jaralandy, delingen ministrliktiń resmi habarlamasynda.
Rýshan aýdanynyń turǵyndary qaqtyǵystan onnan astam adam opat bolyp, ondaǵan adam jaralanǵanyn habarlap úlgergen.
"Quqyq qorǵaý organdarynyń qyzmetkerleri úilerge ruqsatsyz kirip, er azamattar men jastardan 17 mamyrda Horogta ótken narazylyq aktsiiasyna qatysqany úshin izdestirilip jatqandardyń qaida ekenin aitýdy talap etip júr. Aýdandaǵy avtojoldardyń bári jabyq", - dep habarlady jergilikti turǵyn.
Taýly Badahshan avtonomiialy oblysyndaǵy jaǵdai 14 mamyrdan beri ýshyǵyp tur. Sol kúni Horog qalasynyń júzdegen turǵyny Barhorog dep atalatyn jerde narazylyq aktsiiasyn ótkizip, aimaq basshysy Álisher Mirzonabotty, qala basshysy Rizo Nazarzodany qyzmetten alýyn, Badahshan turǵyndaryn qýdalaýdy doǵarýyn, qarasha oqiǵasyn ádil tergeýin, qamaýdaǵy saiasi tutqyndardy bosatýyn talap etti.
Bilik olardyń talaptaryn oryndaýdan bas tartqan soń, dúisenbi kúni jergilikti jastardyń úlken toby oblys ákimdigine qarai bettedi. Chinak dep atalatyn jerde olardy Tájikstan quqyq qorǵaý organdarynyń qyzmetkerleri kútip alyp, narazy topqa qarsy rezińke oq pen kózden jas aǵyzatyn gaz qoldandy.
Resmi málimet boiynsha, osy qaqtyǵys kezinde Horogtyń bir turǵyny qaza bolyp, quqyq qorǵaý organdarynyń úsh qyzmetkeri jaralandy. Jergilikti turǵyndar narazylyqqa qatysqan birneshe adam jaralanǵanyn habarlady.
