Táýelsizdiktiń shirek ǵasyr toiy elden tysqary jerlerde de atalap ótýde. Ulybritaniiadaǵy Ýorik ýniversitetinde oqityn qazaq stýdentter qoǵamdastyǵynyń uiymdastyrýymen ótken sharada sheteldikterge Qazaqstan týraly mol maǵlumat berilip, ulttyq mádenietimiz ben as máziri tanystyryldy.
Bul kúni kisi qarasy kóp jinalatyn ýniversitettiń Piazza ortalyq alańyna kishigirim qazaq aýyly kóship kelgendei boldy. Dúnieniń túkpir-túkpirinen bilim qýyp kelgen sheteldikter qazaqtyń áýezdi áni men kúmbirlegen kúiin, ádemi biin tamashalap, qurt, jent, baýyrsaq siiaqty ulttyq taǵamdardan aýyz tidi. Sondai-aq, Ulybritaniiadaǵy Qazaqstan elshiliginen ákelingen arnaiy kórnekilikter kópshilik nazaryn aýdardy.
Atap aitsaq, aǵylshyn tiline aýdarylǵan Elbasynyń «Kóshbasshy joly» jinaǵy men EXPO2017, Qysqy Ýniversiada qarsańynda daiyndalǵan promo materialdar men kádesyilardy qýana qabyldaǵan sheteldik dostaryna qazaq jastary elimiz týraly áńgimelep berdi. Olardyń Qazaqstan týraly, ásirese, bizdiń eldiń ashyq viza saiasaty, investitsiialyq múmkindikter týraly bile túsýine shara barysynda úlken ekrannan kórsetilgen BBC túsirgen qysqa film de áser etti deýge bolady.
Ýorik Qazaqstan stýdentteri qaýymdastyǵynyń jetekshisi Nurhan Tileýmuratovtyń aitýynsha, shara Táýelsizdiktiń 25 jyldyǵyn toilaý kontseptsiiasyna sai 8 jeltoqsanǵa belgilengen «Nurly bolashaq» taqyrybyna orailastyrylyp otyr. Óitkeni mundaǵy stýdentterdiń basym kópshiligi – «Bolashaq» prezidenttik shákirtaqysynyń iegeri.
Sondai-aq óz qarajattaryn jumsap nemese Ulybritaniianyń Shevining shákirtaqysyna oqyp jatqan stýdentter de jetkilikti. Olar keleshekte básekege myqty maman bop oralyp, el damýyna barynsha úles qosýdy maqsat tutady.
"Ult aqparat"
