«Qazaqstan RTRK» AQ «Balapan» telearnasy Qazaqstan Respýblikasy Táýelsizdiginiń 30 jyldyǵyna túrli janrdaǵy 10 jańa týyndy ázirledi, dep habarlaidy QazAqparat.
Jobalar egemen eldiń tarihy men mádenieti, ǵylymy men bilimi, belesteri jáne tabystary týraly qyzyq ári bala paiymyna laiyqtalǵan. Olardyń 8-i animatsiialyq joba bolsa, 2-i tanymdyq baǵdarlama.
«Balapan»-nyń kórermenderi «Sultan Beibarys» (3D) mýlthikaiasynan bahadúr Beibarystyń balalyq shaǵynan Mysyr Sultany bolǵanǵa deiingi ómirimen tanyssa, «Qaharmannan» (3D) túrkiler dáýirine saiahattap, babalarymyzdyń jankeshti erligin kóredi. Basty qundylyǵymyz –Táýelsizdigimizdi keler urpaqqa tabystaýdy negizgi ózek etken «Altyn kilt» (2D) animatsiialyq serialy búldirshinderdi otansúigishtikke baýlysa, «Ǵaryshker bala Jiger» (2D) arqyly jas jetkinshekter Qazaqstannyń ǵarysh salasyndaǵy jetistikteri men Baiqońyr ǵarysh ailaǵy týraly qyzyq derekterdi biledi. Al «Sen bilesiń be?» tanymdyq baǵdarlamasy Táýelsizdigimizdi alǵannan keiingi eleýli oqiǵalardy, tuǵyrly tulǵalardy tani túsýge yqpal etedi.
Mereke kúnderi telearnadan oiyn-saýyq, oqý-tanymdyq mýlthikaialardy da tamashalaýǵa bolady. «Táp tátti hikaiada» (3D) Konfi men Alýa qorshaǵan ortany tanystyrsa, «Tompidegi» (2D) Áli men Aisha zattardyń pishini men qasietterin uǵyndyryp, mánin ashyp beredi. Telearna biyl álemdik trendke ainalǵan komiks janryn da nazardan tys qaldyrmady. Osylaisha tuńǵysh ulttyq erekshelikterimiz eskerilgen, «Erjúrek saqshylar» (2D) atty komiks ázirlep jatyr. Sonymen qatar, batyrlar jyryn arqaý etken shytyrman oqiǵaly «Er Tarǵyn» (3D) mýltserialy kórermenge usynyldy. Sonymen qatar, kishkentai kórermender tanymdyq «Birge oinaiyq!» baǵdarlamasyn tamashalai alady. Baǵdarlamany erekshe júrgizýshi, tanymal tik-toker Samal Smahan júrgizedi. Baǵdarlamada balalar sýret salady, armandaǵan maman iesi bolady jáne álemdi sharlap, qyzyq maǵlumattarmen tanysady.
Aita ketelik, jyl basynan beri «Balapan» telearnasy jalpy 42 joba óndirdi. Telearna sonymen qatar, «Táýelsizdiktiń 30 jyldyǵyna 30 tartý!» shyǵarmashylyq baiqaýyn uiymdastyrdy. Jyl boiy ótken bul baiqaýda kishkentai kórermender azattyq týraly paiym-túsinigi men keleshek armandary jaily aityp, túrli ónerlerimen bólisti. Baiqaý telearna efiri men áleýmettik jelilerdegi resmi paraqshalarynda qatar júrgizildi. Jeńimpazdar arnaiy syilyqtarmen marapattaldy.
