Táýelsizdiktiń 30 jyldyǵyna orai «Nur-Sultan – Oral» uly marafony búgin Oralda Tuńǵysh Prezident alańynda márege jetti, dep habarlaidy QazAqparat.
Elordadan 26 qarasha kúni bastalǵan marafonǵa qatysqan 15 tájiribeli jelaiaq Kókshetaý – Petropavl – Qostanai – Aqtóbe arqyly jalpy uzyndyǵy 2021 shaqyrymdy segiz kúnde júgirip ótti.
Marafonnyń aiaqtalýyna arnalǵan saltanatty rásimge qatysqan BQO ákiminiń orynbasary Baqytjan Narymbetov óńir basshysy men Aq Jaiyq jurtshylyǵy atynan qatysýshylarǵa rizashylyǵyn jetkizdi.
«Búgin - oraldyqtar úshin erekshe kún. 15 ýltramarafonshy keshe bizdiń oblys aýmaǵyna kirip, Jympity aýylynan, mine, Oralǵa deiin jetip otyr. 2021 shaqyrym júgirip ótý, bylai qaraǵanda, qiial ǵajaiyp áńgime sekildi. Mine, osyny jelaiaqtarymyz shynaiy ómirge ainaldyra bildi. Eń bastysy, elimiz aman, jurtymyz tynysh bolsyn. Táýelsizdigimiz tuǵyrly bolsyn!», dedi Narymbetov.
Aita keteiik, atalmysh marafondy «Astana jelaiaǵy» marafonshylar klýby» QB «Qazaqstan qurylysshylar odaǵy» respýblikalyq zańdy tulǵalar birlestigimen birigip uiymdastyrdy.
Marafonnyń 469 shaqyrymǵa sozylǵan eń uzaq bóligi Qostanai qalasy men Aqtóbe oblysy Áiteke bi aýdany Temirbek Júrgenov aýyly arasynda boldy. Al 148 shaqyrymdyq eń qysqa qashyqtyq BQO-nyń Syrym aýdany ortalyǵy Jympity aýyly men Oral qalasy aralyǵy edi.
Osylaisha marafonshylar uly mártebeli Táýelsizdiktiń 30 jyldyǵy aiasynda otanshyldyq sezimdi baiytý, salaýatty ómir saltyn ornyqtyrý baǵytyndaǵy óz maqsatyna jetti.
