Táýelsizdik kúnine orai Almaty kósheleri taqyryptyq kórkem jaryqpen, memlekettik rámizderi bar bannerlermen jáne installiatsiialarmen bezendirildi, dep habarlaidy QazAqparat.
«Taqyryptyq bezendirý mereitoi kúniniń saltanatyn, óskeleń urpaqtyń boiynda patriottyq sezimdi oiatýdy, Táýelsizdik jetistikteri týraly oilardy, súiikti qala men elge degen qurmetti bildiredi», - dep atap ótti Almaty ákimdiginiń ókilderi.
Sáýlet-kórkem jaryqtandyrý Respýblika, Astana alańdarynda, Tuńǵysh Prezident saiabaǵynda, «Medeý» janyna, «Alataý kreativ hab» ǵimaratynyń aldyna ornatylǵan. Búkil qala boiynsha merekelik bilbordtar ornalastyryldy.
Ulttyq kitaphananyń aldynda erekshe installiatsiia – Táýelsizdiktiń mereitoilyq datasy belgilengen tekshe paida boldy. Aita keterligi, bul móldir tekshe jai qoiylmaǵan, sáýletshiler ony ejelgi simvolǵa baǵalaidy ári adamnyń aqylymen bailanystyrady. Damýdyń, turaqtylyqtyń, beriktiktiń jáne uzaqtyqtyń simvoly.
Alataý aýdany ákimdiginiń aldyndaǵy alańda kiiz úi jáne shańyraq túrinde installiatsiia ornatylǵan, ol qarańǵyda jaryqqa oranyp, erekshe sipatqa bólenedi. Shańyraqtyń ár keregesi memlekettiliktiń qalyptasýyndaǵy belgili bir kezeńdi bildiredi. Kompozitsiia zamanaýi estetikalyq materialdardan jasalǵan.
Taǵy bir merekelik qurylym Naýryzbai aýdany ákimdiginiń aldyndaǵy alańda ornatyldy. Eskertkishte qanatty barysty basqaratyn «Altyn Adam» beinelengen, ol Qazaqstan jerindegi berik memlekettik bilikti beineleidi.
Ál-Farabi dańǵyly, Shyǵys ainalma tasjoly jáne Buqtyrma kóshesi taqyryptyq bezendirilgen. Almaty ákimdigi jańa qalalyq bezendirý ózektiligin joǵaltpaitynyna senimdi, kerisinshe patriottyq dizain qala turǵyndarynyń Otanǵa degen súiispenshiligin oiatady. Bulardan basqa, Táýelsizdiktiń 30 jyldyǵyna arnalǵan mereitoilyq installiatsiialar qalanyń kórneki jerlerine jańarǵan ásem kórinis berýde.
