Almatyda el Táýelsizdiginiń 30 jyldyǵy aiasynda «Qazaqstan Respýblikasyndaǵy bilim berý júiesin jańǵyrtý» kitabynyń tusaýkeseri ótti, dep habarlaidy QazAqparat.
Kitaptyń avtory QR eńbek sińirgen qairatkeri, pedagogika ǵylymdarynyń doktory, professor, QR Ulttyq Ǵylym akademiiasynyń akademigi Alma Ábilqasymova.
Onyń aitýynsha, kitapta elimiz Táýelsizdik alǵan 30 jylda Bilim júiesi qalai damyp, jańǵyrǵany baiandalady.
«Kitapty jazýǵa qalam alý sebebim osy 30 jyldyń ishinde elimizde bilim júiesiniń sonshalyqty damyǵany, bilim júiesine memleket tarapynan kóptegen qoldaý kórsetilip, qomaqty jumystar jasalǵany arqaý boldy. Sondyqtan 30 jylda bilim júiesinde jasalǵan jumystyń barlyǵy kitapta jazyldy. Memleket, Elbasy tarapynan qabyldanǵan memlekettik baǵdarlamalar, Bilim jáne ǵylymdy damytý degen memlekettik baǵdarlamalar, Táýelsizdik alǵan kezdegi qiynshylyqtar. Sondai-aq 1992 jyly qabyldanǵan Bilim zańy, osy zańnyń aiasynda talai iske asqan sharýalar, oqýlyq jasaý tarapynan qabyldanǵan memlekettik qujattar barlyǵy qamtyldy», - deidi Alma Ábilqasymova.
Almaty qalasy qoǵamdyq keńesiniń tóraǵasy, QR joǵary oqý oryndary qaýymdastyǵynyń prezidenti, ekonomika ǵylymdarynyń doktory, professor Rahman Alshanov avtor Táýelsizdik jyldary bilim salasynda eńbek etip, sol tustaǵy jaǵdaimen etene tanys ekenin tilge tiek etti.
«Kitaptyń avtory osy 30 jyldyq tarihty jasaǵan adamnyń biri. Qazir el Táýelsizdiginiń birinshi kúninen bastap barlyq salada kóptegen qatelik ketti degen pikirler aitylyp júr. Avtor sol kezdegi jaǵdaidy naqty dálelmen keltirip jazǵan. Óitkeni ózi sol úderistiń ishinde bolyp, júrip ótken tarihty baiandaǵan. Bul jan-jaqty zerttelgen, tolyq qamtylǵan alǵashqy eńbek. Sonysymen qazirgi kóptegen suraqqa jaýap berip otyr», - deidi Rahman Alshanov.
