Qazaqstan táýelsizdigin alǵan 1991-1992 jyldary dúniege kelgen urpaq qazir 30-dy alqymdap qalǵan ordabuzar azamat bolǵany ras.
Olardyń ishinde el ekonomikasyna, sport salasyna erekshe eńbek sińirip júrgen azamattar bar.
Búgin jaqsylyqtyń jarshysy siiaqty egemendikpen jarysa týǵan táýelsizdiktiń maqtanyshtary týraly jazýdy jón kórdik.
Olardyń biri – Ádilet Tikanov. 29 jastaǵy jigit Almaty tsirkinde jumys isteidi.
Jas akrobat 1991 jyly 21 qyrkúiekte Pavlodar qalasynda týǵan. 1999 jyly Almatyǵa otbasymen kóship kelgen. Talǵar aýdanynyń Panfilov aýylynda bilim alǵan.
«Bala kezimnen break dance biine qumar bolyp, kóshe akrobatikasyna áýes boldym. Biraq, tsirk ártisi bolýdy oilamappyn. Bala kezimde politsiia qyzmetkeri bolýdy armandadym. Eseigen soń dostarym Júsipbek Elebekov atyndaǵy estrada jáne tsirk kolledjine túse bastady. Men de baǵymdy synap kórdim. Osylaisha, oqýǵa grantqa túsip kettim», - dedi Ádilet.
Jaqynda Ádilet «Ýkraina talanty», Kytaida ótken «Central Asia» shoýlaryna qatysyp keldi.
«Qańtarda «British got talent» shoýyna qatysýǵa daiyndalyp jatyrmyz. Jaqynda shyǵarmashylyq ujym videokastingiden ótti. Odan ary qarai Monte-Karloda (Monako) ótetin festivalge qatysamyz. Basqa da festivalderden bas júlde, altyn, kúmis, qola júldeler alyp júrmiz», - dedi ol.
Ádilettiń aitýynsha, qazir balalarda kóp múmkindik bar.
«Bizdiń bala kezimizde kámpit jeýdiń ózi qýanysh bolatyn. Qazir balalarda uialy telefon, qalaǵan oiynshyǵy, kiimi – barlyǵy bar. Olar tarshylyq kórmegen. Munyń barlyǵy – Táýelsizdiktiń arqasy! Qazir memleket tarapynan jastardyń damýyna, bilim alýyna, qalyptasýyna barlyq jaǵdai jasalǵan. Sondyqtan, jastar osyny baǵalaýy kerek. Olar barynsha bilim alyp elin sheteldik arenalarda pash etýge umtylýy tiis», - dedi ol.
Al balýan, Qazaqstan sport sheberi Damir Kúzembaev 1991 jyly 2 qarashada týǵan. 13 jasqa deiin taekvando, odan keiin kúrespen ainalysqan. 2007 jyldan bastap Damir Jańabai Ospanovtan tálim alyp otyr.
Damir Qazaqstan chempionatynda 2 kúmis, 2 qola júlde alǵan. Al 2016 jylǵy Qazaqstan birinshiliginde chempion atandy.
«Eń bastysy, sportta týǵan elimniń mereiin kóterý – maqsatym. Jeńis tuǵyrynda turǵandaǵy sezimdi aityp jetkizý múmkin emes. Barlyq jastar týǵan tilin syilap, ulttyq rámizderin qurmettep tursa – nur ústine nur», - dedi ol.
Damirdiń sheteldegi alǵashqy jeńisi 2008 jyly Tashkentte ótken Aziia chempionatynda boldy.
2013-19 jyl aralyǵynda ótken Aziia chempionattarynan ol júldesiz qaitpaǵan.
Nikita Flipov 1991 jyly 7 qazanda týǵan. Ol jeńil atletikadan Qazaqstannyń halyqaralyq sport sheberi, London Olimpiadasynyń qatysýshysy. 2015 jyly Búkilálemdik ýniversiadada altyn medal ielengen.
Qazir ol jas sportshylardy tárbieleýmen ainalysady
«Ózim táýelsiz eldiń týmasy bolǵandyqtan, bolashaq chempiondardy azat oilaýǵa, jeńimpaz bolýǵa úiretemin. Táýelsizdik bizge ózimizdiń damýdyń jeke dańǵyl jolyn tańdaýǵa, óz ustanymymyzdy, ulttyq ideologiiamyzdy qalyptastyrýǵa múmkindik berdi», - dedi ol.
