Táýelsizdiktiń 30 jylynda 250-den astam otandyq serial túsirilgen, dep habarlaidy QazAqparat.
Bul týraly QR Aqparat jáne qoǵamdyq damý ministri Aida Balaeva Kazmedia ortalyǵyndaǵy Qazaqstan telearnasy túsirgen 6 tarihi serialdyń tanystyrylymynda aitty.
«Táýelsizdik kezeńinde memleketimiz qandai qiyn jaǵdai bolsa da, ónerge, sonyń ishinde kino ónerine erekshe qamqorlyq tanytyp otyrdy. Esterińizde bolsa, eń birinshi otandyq serial «Toǵysqan taǵdyrlar» degen atpen kórermenge jol tartqan edi. Osy ónimderden lep alyp, keiin talai serialdar túsirildi. Olardyń ishinde sapalysy da, sapasy tómenderi de boldy. Halyqtyń synyna ushyraǵandary da bar. Otandyq ónimderdi maqtaýshylar da, dattaýshylar da tabylady. Biraq, munyń bári osy salanyń qalyptasyp, damýyna septigin tigizdi. Sol jobalar arqyly óstik, tájiribe jinadyq, sapany kóterdik», - dedi ministr.
Vedomstvo basshysynyń sózine qaraǵanda, Táýelsizdiktiń 30 jylynda qazaq kino indýstriiasy óz jolyn tapqan.
«Kino indýstriiasy, sonyń ishinde serialdar indýstriiasy jyldan-jylǵa qarqyn alyp keledi. Keiingi 5 jyldyń ishinde 3500-den astam seriiadan turatyn 250-ge jýyq serial túsirildi. Onyń 50-den astamy Túrkiia, Ózbekstan, Qyrǵyzstan, Resei memleketterinde satyldy. Osydan 10 jyl buryn serial daiyndaityn prodakshn kompaniialar saýsaqpen sanaityn edik. Qazir bul saladaǵy báseke óte joǵary. Mysaly, biyl ótken Astana Media Week jobasyna serial janrynda qatysqysy kelgen 100-den astam prodakshn kompaniiadan ótinish tústi. Bul salanyń kúndelikti damyp jatqanyn kórsetedi», - dedi Aida Balaeva.
