Táýelsizdik týyn jelbiretken poiyz Kókshetaý jurtshylyǵymen júzdesti

Arqanyń arailanǵan aq tańymen ilesken «Táýelsiz Qazaqstan» poiyzyn kókshe­taý­lyqtar kóńil tórindegi ys­tyq yqylaspen qarsy aldy.

Qala qaqpasy – temir jol be­keti bar jasaýyn taǵynyp alǵan. Sáni men saltanaty ja­rasqan halyqtyń aldynda Aqmola oblysy ákiminiń oryn­­­basary N.Nurkenov qur­met­­ti qonaqtarǵa quttyq­taý só­zin joldady. Al «Táýel­siz Qa­­zaqstan» poiyzy shtaby­nyń je­tek­shisi, tarihshy ǵa­lym Á.Álpeiisov shara­­­nyń ma­ńyz­dylyǵyna toqtaldy.

Osy kúni Aqmola oblystyq jáne Kókshetaý qalalyq aýrýhanalarynda, salamatty ómir saltyn qalyptastyrý ortalyǵynda bolǵan nevrolog, nefrolog, ýrolog, gematolog, ortoped-travmotolog, revmatolog, pýlmonolog, pediatr, gas­troenterolog, angihirýrg, kardiolog, endokrinolog, oftalmolog, onkolog mamandar aqmolalyqtardy qabyldap, elimizdiń túrli meditsi­na­­lyq mekemelerine joldama ber­di. Dárigerlerdiń arasynda Qaraǵandydan kelgen Maqajanov atyndaǵy travmatologiia jáne ortopediia oblystyq ortalyǵynyń balalar travmatolog-ortopedi D.Ábenovti sózge tartqan edik.

– Oblystyq balalar aýrýhanasy zamanaýi talaptar dárejesinde jabdyqtalǵan eken. Munda bilikti mamandar da jetkilikti. Biz segiz balany qabyldadyq. Em-sharanyń bastapqy kezeńi sátti ótkeni bai­­qalady. Aralarynda Astananyń ǵylymi ortalyqtarynda emdelý­ge jatatyndary da bar. Biz olarǵa tiis­ti keńester berdik. Jal­py, Kókshetaý emhanalary men aýrý­­hanalaryndaǵy igi isterge buryn­nan qanyq ekenimizdi aitqym kele­di. Ózara tájiribe almasýǵa da múm­kindik týdy, – deidi D.Ábenov.

Parlament Májilisiniń depýtaty, Qazaqstan halqy Assambleiasy depýtat­tyq tobynyń jetekshisi S.Abdrahmanov bastaǵan top Dos­tyq úiinde etnomádeni bir­le­s­tikter men jastardyń qaty­sýy­men dóńgelek ústel májilisin ót­kizdi. Onda sóz alǵan Qazaqstan halqy Assambleiasy men ulttyq birlestikterdiń ókilderi «Táýelsiz Qazaqstan» aktsiiasynyń maqsaty – Táýelsizdik jyldarynda qol jetken tabystardy kórsetý, osy arqyly el birligin nyǵaitý, qoǵamdy toptas­tyrý, otanshyldyqty ornyqtyrý ekendigine erekshe ekpin túsirdi.

«Nur Otan» partiiasy oblystyq filialynyń ǵimaratynda poiyz quramynda kelgen Ádilet ministr­liginiń ókilderi S.Aqjanbaev, G.Qaiyrbekova, A.Shalkenova oblys turǵyndaryn qabyl­­dap, olar­­dyń máselelerin sheshýge qa­jet­ti keńesterin berdi. Bul sha­raǵa Kókshetaý qalasynyń prokýrory A.Rizanov, Turǵyn úi-kom­mýnaldyq sharýashylyǵy jáne energetika basqarmasynyń basshysy V.Radchenko, oblystyq ádilet departamenti basshysynyń orynbasary G.Ákimova, Kókshetaý qalasy ákiminiń orynbasary A.Ámirenova, qalalyq bilim bóliminiń basshysy B.Júsipov jáne taǵy basqa memlekettik organdardyń basshylary da qatysty.

Qabyldaýǵa alǵashqylardyń biri bolyp kirgen V.Magomedova óziniń burynǵy kúieýiniń kámeletke tol­maǵan balalaryna aliment tóle­mei, tiisti organdardyń shyǵarǵan sheshimderine baǵynbai júrgendigin, sot oryndaýshylarynyń jumysyna da kóńili tolmaityndyǵyn jetkizdi. Bul rette, Ádilet ministrliginiń ókili, sarapshy G.Qaiyrbekova oǵan aqyl-keńesterin aityp, máse­le­ni jedel sheship beretindigin, bu­ryn­ǵy kúieýimen de bailanysqa shyǵatynyn aitty. Jáne sol arada osy ispen ainalysqan jeke sot oryndaýshysymen habarlasyp, jaǵdaidy túsindirdi.

Al Krasnyi iar aýylyna baratyn jolda ornalasqan «Maiak» saiajai kooperativinde turyp jatqan kópbalaly otbasynyń otaǵasy J.Bostandyqov pen onyń áieli R.Uzaqbaeva balalarynyń tór­teýi Kókshetaý qalasyndaǵy №10 mektepte oqityndyǵyn jáne ózderi turyp jatqan kooperativte elektr jaryǵy joq ekendigin aityp aryzdandy. Turǵyn úi-kom­mý­naldyq sharýashylyǵy jáne energe­tika basqarmasynyń basshysy V.Radchenko bul máseleni aldaǵy bes kún ishinde sheship beretindigin aitty.

Sondai-aq, qabyldaýda «Nurly kósh» aýylynda mektep, bala­baq­sha salý, balalarǵa oiyn alań­da­ryn uiymdastyrý jónindegi suraq­­tarmen kelgen turǵyndar da boldy. Jergilikti quzyrly organ ókilderi aldaǵy ýaqytta shaǵyn aýdan balalary úshin oiyn alańdary saly­natyndyǵyn málimdedi. Sony­men qatar, densaýlyq saqtaý sala­synyń ókilderine jańa týǵan sábidiń balalar taǵamyn tegin berý máselesi boiynsha shaǵymdanyp kelgender boldy. Bul oraida, olarǵa tegin taǵam bólýdiń erejeleri men talaptary túsindirildi.

«Táýelsiz Qazaqstan» poiyzy­nyń músheleri Kókshetaý saparyn­da 8 topqa bólinip qala men ja­qyn eldi mekenderden kelgen azamattardyń kásipkerlik, bi­lim alý, quqyqtyq ustanymdar, ju­mys­pen qamtý, áleýmettik kómek, qo­ǵam­dyq qatynastar siiaqty ózekti máse­leler boiynsha keń kólemdi túsinik jumystaryn júrgizdi. Bul kúni mádeniet oshaqtarynda, bilim ordalarynda, eńbek ujymdarynda ótkizilgen taǵylymdy sharalarǵa jurtshylyq kóptep jinalyp, erekshe jelpinis ústinde boldy. «Táýelsiz Qazaqstannyń» maqsaty da osy dep uqtyq.

Baqbergen AMALBEK,

«Egemen Qazaqstan»

Aqmola oblysy

Sýretti túsirgen

Berik ESKENOV