QR Táýelsizdiginiń 30 jyldyǵyna orai Qaraǵandy oblysy ákimdigi mádeniet, arhivter jáne qujattama basqarmasynyń bastamasymen «Mádeniet portaly» aqparattyq agenttiginde tuńǵysh ret ótkizilgen «Táýelsizdik: Sóz ben Sýret» atty aqyndar men sýretshiler arasyndaǵy respýblikalyq baiqaýynyń marapattaý keshi ótti, dep habarlaidy "Mádeniet portaly".
Elimizde buǵan deiin bolmaǵan mega jobanyń aiasynda jeńimpaz sýretshilerdiń kórmesi uiymdastyryldy. Kórmege qazaq beineleý óneri men ádebietiniń maitalmandary jáne Qaraǵandy oblysynyń elim dep emirengen tulǵalary qatysty.
«Táýelsizdik: Sóz ben Sýret» respýblikalyq baiqaýynyń sýretshilerge arnalǵan kezeńińe qazylyq etken qazylar alqasynyń tóraǵasy, QR eńbek sińirgen qairatkeri, "Qazaq Eli" monýmentiniń avtory Sembiǵali Smaǵulov kórmege qoiylǵan árbir kartinaǵa jeke-jeke toqtalyp, qazaq beineleý óneriniń qaryshtap damyp kele jatqanyna qýanǵanyn jasyrmady.
Baǵdarlama boiynsha kórmeden keiin jeńimpaz aqyndardyń óleńderi qazaq, orys jáne aǵylshyn tilderine aýdarylyp, sýretshilerdiń kartinalarymen birge jaryqqa shyqqan arnaiy albomnyń tusaýkeseri ótti.
Tusaýkeserde sóz alǵan Qaraǵandy oblysy ákiminiń orynbasary Abzal Núkenuly QR Táýelsizdiginiń 30 jyldyǵyna orai uiymdastyrylǵan mega jobanyń qatysýshylaryna shyǵarmashylyq tabys tilep, atalǵan jobanyń budan ári dami hám jetile túsýine tilek bildirdi.
Respýblikalyq baiqaýdyń aqyndarǵa arnalǵan kezeńine qazylyq etken qazylar alqasynyń múshesi Serik Saǵyntaev, sarapshylar múshesiniń tóraǵasy Suraǵan Rahmetuly jáne qazaqtyń kórnekti aqyny Ǵalym Jailybai da qos ónerdiń basyn biriktirgen jobanyń uiymdastyrýshylary Qaraǵandy oblysy men «Mádeniet portaly» zor alǵysyn bildirdi.
Ármen qarai «Táýelsizdik: Sóz ben Sýret» respýblikalyq baiqaýynyń marapattaý keshi jeńimpaz sýretshiler men aqyndardyń shyǵarmalary jaily arnaiy túsirilgen beinerolikterdi tamashalaýmen jalǵasty. Kesh barysynda jeńimpazdar arnaiy diplomdar men qarjylai syilyqtarmen marapattaldy.
Aita keteiik, tórt aiǵa sozylǵan mega jobanyń sýretshilerge arnalǵan alǵashqy kezeńine 101 sýretshi, 300-den astam kartina kelip tússe, ekinshi kezeńde 100-ge jýyq aqyndar baqtaryn synady. Olardyń ishinen tek qana 8 sýretshi men 8 aqynúzdikter qatarynan tabyldy.
