Táýelsizdik shejiresi Elbasynyń qolymen jazyldy. Bul týraly Táýelsizdiktiń 30 jyldyǵyna arnalǵan saltanatty is-sharada QR Prezidenti Qasym-Jomart Toqaev aitty, dep habarlaidy QazAqparat.
«Múldem jańa geosaiasi ahýalda memleket qurý - ońai sharýa emes, naǵyz kóshbasshynyń ǵana qolynan keletin is. Eń kúrdeli, bulyńǵyr kezeńde Nursultan Ábishuly Nazarbaevtai dara tulǵa tarih tórine shyqty. Anyǵyn aitqanda, Táýelsizdik shejiresi Elbasynyń qolymen jazyldy. 1991 jyly 1 jeltoqsanda halqymyz oǵan biraýyzdan daýys berip, senim mandatyn tapsyrdy. Al 16 jeltoqsanda Prezident Qazaqstan Respýblikasynyń Memlekettik táýelsizdigi týraly Konstitýtsiialyq zańǵa qol qoidy. Aqiqatyn aitsaq, bul halqymyzdyń tarihyndaǵy eń qýanyshty ári baqytty sát boldy», - dep atap ótti QR Prezidenti.
Memleket basshysy sol sátten qazaq eliniń jańa dáýiri – Táýelsizdik dáýiri bastalǵanyn atap ótti.
«17 jeltoqsanda Elbasy Almatydaǵy alańǵa kelip, eldiń ortasyna shyqty. Tuńǵysh Prezident: «Halqymyzdyń biligi tolyq óz qolyna tidi. Azat kún týdy» dep halyqtan súiinshi surady. Onyń tebireniske toly sol sózi jurttyń jadynda jattalyp qaldy. Tipti keibir adamdar Táýelsizdiktiń qundylyǵyn jete túsinbeýi múmkin. Al aǵa býyn onyń qandai qiyndyqpen kelgenin jaqsy biledi. Tarihi kúnderdiń árbir minýtyn tek Elbasy ǵana sezinip, basynan ótkergen dep aitsaq artyq emes», - dedi Memleket basshysy.
