Oblys ákimi Janseiit Túimebaev Táýelsizdik kúni qarsańynda Kentaý qalasynda jańa páterlerge ie bolǵan jas mamandardyń qýanyshymen bólisýge bardy. Bul kúni ondaǵy Eski Iqan aýyldyq okrýginde 2 qabatty 10 páterli qyzmettik turǵyn úi óz qojaiyndaryn tapsa, Shaǵa aýyldyq okrýgine qarasty Yntymaq aýylynda da 10 páterli 2 turǵyn úidiń kilti berilip, bul kúni Kentaýda jalpy sany 30 páter ielerine tabystaldy, dep habarlaidy "Ult aqparat".
Olar baspanaǵa oblys ákiminiń tapsyrmasymen bilikti kadrlardy aýyldarǵa tartý maqsatynda qolǵa alynǵan baǵdarlamasy aiasynda qol jetkizip otyr. Mereili merekede úili bolǵandardyń ishinde muǵalimder men dárigerler, jáne quqyq qorǵaý salasynyń ókilderi bar.
Oblys basshysy baspanaly bolǵan mamandarǵa páter kiltterin tabystap, quttyqtaýyn jetkizdi.
«Táýelsizdigimizdiń arqasynda elimizdiń eńsesi kóterilip keledi. Memleket basshysynyń halyqty baspanamen, jumyspen qamtýǵa arnalǵan baǵdarlamalarynyń nátijesinde qanshama otbasy baspanaly bolyp, jumysqa ornalasýda. Búgin mine Táýelsizdigimizdiń 27 jyldyǵy qarsańynda Kentaý qalasyna qarasty Eski Iqan men Yntymaq aýylynda jas mamandarymyzǵa 30 páter berilip jatyr. Endeshe eńbekterińizge bereke, jańa baspanalaryńyzǵa qut darysyn», - dedi Janseiit Qanseiituly.
Aita keterligi, aýyldarǵa qajetti mamandardy kóptep tartý úshin qabyldanǵan baǵdarlama boiynsha oblysymyzda 330 páterli 33 úidiń qurylysy bastalǵan edi. Mine Táýelsizdik merekesi qarsańynda solardyń alǵashqylary paidalanýǵa berilip otyr.
