Táýelsizdik kúni qarsańynda Túrkistan qalasynda 600 oryndyq jańa mektep ashyldy, dep habarlaidy «Ult aqparat» oblys ákimdiginiń baspasóz qyzmetine silteme jasap.
Jańa bilim uiasy memlekettik-jekeshelik áriptestik aiasynda boi kótergen. Jańa mekteptiń ashylý rásimine Túrkistan qalasynyń ákimi Nurbol Turashbekov qatysyp, ata-analar men oqýshylarǵa izgi tilegin jetkizdi.
«El Prezidenti Qasym-Jomart Toqaevtyń Jarlyǵymen bekitilgen 10 Ulttyq jobasynda bilim berý baǵytyna basa nazar aýdarylǵan. Munyń barlyǵy Táýelsizdiktiń tiregi — jas býynnyń sapaly bilim alýy úshin jasalǵan jaǵdailar. Óitkeni, sapaly bilim ǵana sanaly urpaqtyń qalyptasýyna yqpal etedi», dedi qala ákimi Nurbol Turashbekov.
«Arman – M School» mektebinde jaily synyptar men ashana, sport zaly, májilis zaly, meditsina bólmesi siiaqty mańyzdy bólmelermen qamtamasyz etilgen. Sonymen qosa, jeke pánderge arnalǵan arnaiy kabinetter de qarastyrylǵan. Endi «Birlik» móltek aýdanynda ornalasqan E.Izzatýllaev atyndaǵy jalpy orta mektebinde úsh aýysymda bilim alyp kelgen 1700-den astam oqýshynyń 650-i jańa mektepte oqityn bolady.
Jalpy oblys ortalyǵyndaǵy 34 memlekettik, 27 jekemenshik mektepte 50 myńnan astam oqýshy bilim alyp, 5 myńǵa tarta pedagog jumys isteidi.
Aldaǵy ýaqytta qala aýmaǵynda 11 mekteptiń qurylysy josparlanýda: 2 mektep respýblikalyq biýdjet esebinen, 9 mektep «Jaily mektep» Ulttyq jobasy aiasynda boi kóteredi.
