Foto: Aqorda
Memleket basshysy Qasym-Jomart Toqaev Qazaqstan halqyn Táýelsizdik kúnimen quttyqtady.
- Qurmetti otandastar!
Sizderdi Táýelsizdik kúnimen quttyqtaimyn!
Bul – halqymyzdyń azattyq týraly armany aqiqatqa ainalyp, eldik dástúrlerimiz jańǵyrǵan kún. Osy mereili merekede bárimiz babalar amanatyna árdaiym adal bolýdyń jáne ult bolashaǵyna zor jaýapkershilikpen qaraýdyń mán-mańyzyn tereń túsinemiz. Sebebi táý eter Táýelsizdigimiz – barshaǵa ortaq qundylyq ári barlyq igiligimizdiń bastaýynda turǵan baǵa jetpes bailyq. Táýelsizdigimizden biik esh nárse joq. Ony kózdiń qarashyǵyndai qorǵaý – ár azamattyń perzenttik paryzy.
Búginde Qazaqstan halyqaralyq deńgeidegi abyroi-bedeli joǵary, strategiialyq baǵdary aiqyn memleket retinde bolashaqqa nyq senimmen qadam basyp keledi. Halqymyz buǵan eseli eńbek pen yrysty yntymaqtyń arqasynda qol jetkizdi. Biz osy berekeli birligimizdi, qoǵamdaǵy tynyshtyq pen turaqtylyqty saqtai otyryp, qiyndyqtyń bárinen súrinbei ótemiz. Táýelsiz elimiz órkenietti, ozyq memleket retinde dami beredi.
Barshańyzǵa zor densaýlyq, mol tabys tileimin!
Qasterli Otanymyz ósip-órkendei bersin! - delingen quttyqtaýda.
Aita keteiik, búgin Qazaqstan Respýblikasynyń «Memlekettik táýelsizdigi týraly» Konstitýtsiialyq Zańǵa qol qoiylǵanyna 33 jyl tolyp otyr.
.jpeg)