Táýelsiz jýrnalist Robin Akroid «Uly qolbasshy Shyńǵyshannyń joǵalǵan molasyn taptym» dep, jarty álemge jar saldy.
«Bul málimdeme onyń — «Shyńǵyshan: Kieli Mazar, jumbaq qazyna» (“Genghis: Sacred Tomb, Secret Treasure”) kitabyna engen», — dep habarlaidy britandyq Rressgazette basylymy (29 qańtar, 2016 jyl).
Akroid belgisiz molanyń orny soltústik Mońǵoliiadaǵy biik taýdyń basynda dep esepteidi. Onyń janynda nemeresi Qubylaidyń jatqany jaily da aqpar beredi.
Ol atty ekspeditsiia qatarynda saiyn dalany kezip, kóshpendiler arasynda ómir súrip, «Úlken Jumbaq Ǵibadathana» shólimen 700 km júrip shyqqan.
Jýrnalist Uly qolbasshynyń 1227 jyldyń tamyzynda qazirgi soltústik Qytai aýmaǵynda dúnie salǵanyna qaramastan, denesi jerlenýi úshin Mońǵoliia aýmaǵyna jetkizilgen degen qorytyndyǵa kelipti.
Ol óz kitabynda: «Shyńǵyshan Qytai jerindegi Ishki Mońǵoliialyq Ordosta jerlenbegen. Onyń ataqty kesenesi jái ǵana eskertkish. Sonymen qatar, han jerlengen jerdi uranhai taipasy kúzetken. Olar salyq pen áskeri qyzmetten bosatylǵan. Sol sebepti, qaǵandy jerge tapsyrý rásiminiń kýási bolǵan kúzetshiler týraly derekten olardyń ólim jazasyna kesilgenin túsinýge bolady» degen.
Ejelgi mońǵol derekterin aýdarǵannan soń jáne óziniń jerdegi zertteýlerinen keiin Akroid Uly Qaǵannyń aqyrǵy mekeni týraly burynǵy teoriialar men derekterdi joqqa shyǵaryp otyr. Sonymen qatar, jýrnalist óziniń teoriiasynyń Mońǵol úkimetimen maquldanǵanyn aitady.
