Qostanai jurty Táýelsizdigimizdiń 25 jyldyǵy mereili toiy aldynda respýblikalyq aktsiiamen eldi bir aralap qaitýǵa jolǵa shyqqan «Táýelsiz Qazaqstan» poiyzynyń keletin kúnin sanap júr edi.
Qarashanyń qyryq qubylǵan kúnine qaramai ertemen qostanailyqtar, oblys, qala basshylary poiyzdy temir jol vokzalynan qýanyshtyń nyshanyndai syrnailatyp-kerneiletip kútip aldy.
Oblys ákiminiń orynbasary Marat Júndibaev qonaqtardy elimizdiń eń qasietti óńiriniń biri – Qostanai jerine kelýimen quttyqtady. «Jiyrma bes jyl ishinde Qazaqstandy búkil dúnie júzi tanydy, Elbasymyzdyń syndarly saiasatynyń arqasynda halyqaralyq bedeldi uiymdarǵa múshe boldyq. Biz Táýelsizdikke sol úshin de qaryzdarmyz», dedi ol.
Qazaqstanda óndiriletin astyqtyń tórtten birin beretin Qostanaidyń qamyrlylyǵy joǵary, altyndai bidaiyn dúnieniń jartysy biledi dese, kim senbeidi?! Eksportqa shyǵarylatyn unnyń da tórtten biri Qostanaidan artylady. Biyl da oblys mol astyq jinady. «Qutty qonaq kelse, qoi egiz tabady» degen sózdiń jany bar. Biyl on aida Qostanai oblysynda óndiriletin ónimniń fizikalyq kólemi sońǵy bir jarym jylda birinshi ret 100 paiyzdy qurady. Al oblys uzaq jyldardan beri kenniń temir, asbest, boksit túrlerin óndiredi. Biraq naryq jer astynyń bailyǵyn shetke asyra bergennen góri, óńdeý ónerkásibin damytqanda baiitynymyzdy meńzep otyr. Qazir Qostanai oblysynda óńdeý ónerkásibi shikizat óndirýdiń aldyna shyqty. Bul damýdyń jaqsy nyshany ekeni anyq. Qostanaida «Toyota», «Ssang Yong» sekildi álemdik brend avtomashinalar qurastyrylady. Qostanai elimizdegi mashina jasaý óndirisiniń ortalyǵyna ainalmaq.
«Táýelsiz Qazaqstan» poiyzynyń shtab jetekshisi, professor Ámirjan Álpeiisov Qostanai jurtyn alda kele jatqan Táýelsizdik merekesimen quttyqtady. Sonymen qatar, poiyz negizinen áleýmettik máselelerdi nysana etkenin de aitty. Ainaldyrǵan eki aptanyń ishinde poiyzdyń 271 múshesi boldy, onyń ishinde salalar mamandary túrli keńester beredi, jetpisten asa dáriger jergilikti jerlerde aýrýlardy qabyldady. Olar Qostanaida da iske shuǵyl kiristi. Oblystyq aýyl sharýashylyǵy basqarmasynda sharýalar men diqandar mamandardan kóptegen suraqtaryna jaýap aldy. Solardyń arasynda poiyzdyń Qostanaida toqtaitynyn estip, at terletip Áýliekól aýdanynan kelgen sharýa qojalyǵynyń jetekshisi Baýyrjan Raiysovty kópten beri jaiylym týraly másele oilandyratyn. Ol poiyzben kelgen mamandardan naqty jaýabyn estip ketti.
Jumyspen qamtýdy úilestirý jáne áleýmettik baǵdarlamalar basqarmasynda «Táýelsiz Qazaqstan» poiyzymen ministrlikten kelgen ókilderge kirý úshin jurt kezekke turdy. Solardyń arasynda Ózbekstannan atajurtqa oralǵan, Rýdnyida turatyn qandas aǵaiyndar da tóbe kórsetti. Táýelsizdik alǵan jyldardan bastap sheteldegi qazaqtardyń atajurtqa kóshi toqtaǵan joq. Alaida, olardyń tólqujat, azamattyq alýyna bailanysty máseleler áli tiianaqty sheshimin tappaǵany ókinishti. Ózbekstannan kelgen aǵaiyndarǵa burynǵy tólqujatyn sol eldiń Qazaqstandaǵy elshiligine aparyp tapsyrý, yqtiiarhat alý merzimi sekildi máseleler qiyndyq týǵyzyp otyr. Osy máselelerdi aitý úshin Nuriddin Búkirbaev aqsaqal men Talǵat Ahmetov poiyzǵa qýana, asyǵa jetti.
Oblystyq «Qoǵamdyq kelisim» úiinde ótken qoǵamdyq qabyldaýǵa jergilikti etnostar jáne ziialy qaýym ókilderi kelipti. Olardy «Táýelsiz Qazaqstan» poiyzynyń músheleri tyńdady. Qostanaidaǵy belgili ardager ustaz Begen Kópeshev osy poiyzdyń quramynda bar ekenin estip, Májilis depýtaty, belgili qalamger Saýytbek Abdrahmanovty ádeii izdep kelgenin aitty. Ol kemeńger ustaz Ybyrai Altynsaringe osy ýaqytqa deiin respýblikada laiyqty bir eskertkishtiń joqtyǵyn másele etip qoidy. Dárigerler densaýlyqtaryna beijai qaramaityn qostanailyqtardy tańerteńnen keshke deiin qabyldady. Poiyzben kelgen dárigerlerge barlyǵy 408 naýqas qaraldy, olardyń 69-y – bala. Dárigerler 56 adamǵa Astanadaǵy, Almatydaǵy ortalyq klinikalarǵa qaralý jóninde keńes jáne joldama berdi, olardyń arasynda 19 bala bar.
Názira JÁRIMBETOVA,
«Egemen Qazaqstan»
QOSTANAI
.jpeg)