«Táýelsiz Qazaqstan» poiyzy respýblikalyq aktsiiasy barysynda turǵyndardyń ótinish-tilekteri muqiiat tyńdalyp, máselelerdi sheshý joldary jan-jaqty qarastyryldy
Qazaqstan halqy Assambleiasynyń bastamasymen uiymdastyrylǵan «Táýelsiz Qazaqstan» poiyzy Qyzyljar óńirine túndeletip keldi. Ýaqyttyń keshtigi men qarashanyń qara sýyǵyna qaramastan, perronda qarsy alýshylardyń qarasy qalyń boldy. Poiyz jolaýshylaryna nan men tuz usynylyp, shashý shashylyp, úrlemeli orkestrdiń súiemeldeýimen ekpindi áýen oinaldy.
Vokzal basynda ótken mitingide sóilegen sózinde oblys ákiminiń birinshi orynbasary A.Saparov egemendik alǵan jyldar ishinde Elbasynyń sarabdal saiasatynyń arqasynda Qazaqstan áleýmettik-ekonomikalyq, basqa da salalar boiynsha joǵary jetistikterge jetkenin, álem tanyǵan irgeli memleketke ainalǵanyn, ultaralyq, konfessiiaaralyq tatýlyq, qoǵamdaǵy túsinistik basty qundylyqtarymyzdyń biri bolyp tabylatynyn atap kórsetti. Al poiyz shtabynyń jetekshisi Á.Álpeiisov jinalǵan kópshilikke arnaǵan sózine qazaqstandyqtar úshin ulyq merekeniń orny bólek ekenin arqaý ete otyryp, el ishine saparǵa shyqqan «Táýelsiz Qazaqstan» poiyzynyń mán-maqsatyn bóle-jara aitty. Sharanyń basty maqsaty–Qazaqstan Respýblikasynyń Tuńǵysh Prezidenti Nursultan Nazarbaevtyń basshylyǵymen óz damý jolyn tapqan Qazaqstannyń tabystaryn pash etý, «Máńgilik El» ideiasyn jan-jaqty túsindirý, óskeleń urpaqty otansúigishtik, izgilik qasietterge tárbieleý, túrli mádeni sharalar sheńberinde mádeni qazynalarymyzdy dáripteý, sonymen qatar, dárigerlik, áleýmettik muqtajdyqtardy sheshýge kómektesý.
11 kúnniń ishinde 17,5 myń adam qamtylyp, tórtten birine meditsinalyq kómekter berilipti. Soltústikqazaqstandyqtar atynan sóz alǵan Petropavl qalalyq ardagerler keńesiniń tóraǵasy G.Kýhar, M.Qozybaev atyndaǵy Soltústik Qazaqstan memlekettik ýniversitetiniń stýdenti N.Nadirov mundai aktsiialardyń qoǵamdy biriktirýshilik, ulttardy jaqyndastyrýshylyq, izgi maqsattarǵa umtyldyrýshylyq, qiyndyqtardy birigip eńserý mańyzyna toqtaldy.
Dostyq úiinde Qazaqstan halqy Assambleiasy Qoǵamdyq kelisim keńesiniń keńeitilgen otyrysy ótti. Onda qoǵamdyq máni bar jailar kóbirek qozǵaldy. Máselen, F.Litfýllin Pestroe kóline qatysty shetin máseleni qorshaǵan orta men ekologiiadan bóle-jaraýǵa qaraýǵa bolmaitynyn, V.Remba Beloe eldi mekenindegi joldy jóndeý qajettigin, J.Tájin inkliýzivti oqytýdyń ulttyq standarttaryn qalyptastastyrý múmkindikterin, R.Samaev «Diplommen–aýylǵa!» baǵdarlamasy aiasynda ózge óńirlerdiń birine baryp, jumys isteýge kómek kórsetýdi alǵa tartty. Sondai-aq, S.Hasenovtiń, N.Protopovtyń, E.Netesovanyń jeke bas máselelerine qatysty tiisti oryndarǵa naqty tasyrmalar berildi.
Etnomádeni birlestikter, bilim berý, densaýlyq saqtaý, shyǵarmashylyq ziialy qaýym, jastar, úkimettik emes uiymdar ókilderiniń qatysýymen Elbasynyń saiasatkerlik, kóshbasshylyq rólin, Táýelsizdigimizdiń, memlekettiligimizdiń damý ornyn aiǵaqtaityn, «Qazaqstan-2050» Strategiiasynyń, «Máńgilik El» ideiasynyń, «100 naqty qadam» Ult josparynyń negizgi qaǵidattaryn túsindirýge arnalǵan lektsiialar oqyldy. Sol siiaqty «Táýelsizdik tarihy–ult rýhynyń ólshemi», «Máńgilik El–bolashaǵy birtutas ulttyń rýhani negizi», «Beibitshilik pen kelisim úlgisi–Qazaqstan brendi» taqyryptary aiasynda ótken kezdesý-júzdesýlerdiń de tanymdyq-taǵylymdyq máni zor boldy.
Jastar saraiynda uiymdastyrylǵan «Jaqsylyq jasa!» qaiyrymdylyq aktsiiasy búldirshinderge arnalyp, oǵan shyǵarmashylyq ujymdar, animatorlar, jármeńkeshiler belsene qatysty. Qyzyqty oiyndar uiymdastyrylyp, taýarlar men qolóner buiymdaryn satýdan túsken qarajat týabitti dimkástikke ushyraǵan A.Kýriev pen I.Zologinniń em-domyna jumsalatyn boldy.
Bul kúni aq halatty abzal jandarda esh tynym bolǵan joq. Olar birneshe topqa bólinip, oblys ortalyǵy men Qyzyljar aýdanyndaǵy emhanalarda meditsinalyq qyzmet kórsetti. Dárigerlerdiń qabyldaýyna kelgen adamdar tolyqqandy tekserilýden ótip, keńester aldy. Biǵaisha degen keiýana nemerem ekeýmiz bilikti dárigerlerge kórinip, densaýlyǵymyzdy qaratyp aldyq. «Apalap» quraq ushqan peiilderine rizamyz, dese, Anatolii esimdi kásipker shaǵyn jáne orta biznes salasyna qatysty dilgir suraqtarǵa qanaǵattanarlyq jaýap alypty. Azamattardyń eńbek quqyǵyn qorǵaý, zeinetaqy taǵaiyndaý, baspanamen qamtamasyz etý máseleleri boiynsha da paidaly keńester usynyldy.
BAQ ókilderimen ótken brifingte Qazaqstannyń qýatty memleket retinde ornyqqany, halyqtyń turmys sapasy jaqsarǵany, áleýmettik qoldaýlardyń artqany atap kórsetildi.
Ómir ESQALI,
«Egemen Qazaqstan»
Soltústik Qazaqstan oblysy
.jpeg)