Túrkistan oblysyndaǵy «Sairam-Ógem» shatqalynda iz-túzsiz joǵalyp, máiitteri tabylǵan tórt týristiń ólimine qatysty alǵashqy boljamdar aityldy.
Olardy 28 kún boiy izdestirgen óńirdiń qutqarýshylary máiitterdiń barlyǵy Ógem ózeninen shyqqanyn jetkizdi, dep habarlaidy "Ult aqparat".
Oblystyq TJD bastyǵynyń orynbasary Erik Sarybaevtyń aitýynsha, jaiaý júrispen 2543 shaqyrym qaralsa, áýede tikushaqpen 16090 shaqyrym aýmaqta izdestirý sharalary júrgizilgen. Súńgýirler Ógem ózeniniń boiymen 22 shaqyrym jerdi qarap shyqqan. Nátijesinde birinshi jigittiń máiiti tabylǵan jer men ekinshi týristiń máiitiniń arasy 6 shaqyrymdy quraǵan. Al, úshinshi men tórtinshi máiittiń arasy 7 shaqyrym jerden asqan. Qutqarýshylar alǵashqy boljam retinde tórteýi qol ustasyp, Ógem ózeninen birge ótpek bolǵan kezde sýǵa aǵyp ketýi múmkin deidi. Alaida sýdyń ekpini tym qatty bolǵandyqtan olardy aǵysy alyp ketýi múmkin ekenin joqqa shyǵarmaidy. Al, ekinshi boljam retinde olardyń ózenniń tastar kóp jatatyn jeri Taskópirden ótpek bolǵan dep aitylýda. Alaida sýda jatqan tastardyń beti taiǵaq bolǵandyqtan biri aǵyp ketip, qalǵandary qutqaramyz dep oqtalǵan bolýy múmkin. Al, úshinshi boljam retinde aiýlardan qoryqqan.
«Izdestirý barysynda osy tóńirekte aiýlardy óte kóp kezdestirdik. Bir jiyrmadan asa aiýdy kórdik. Al aiýdyń ózine tán qasieti - balalary úshin óte agressivti bolatyn kez bul. Múmkin, bul jigitter ózendi boilap júrgen kezde aldarynan aiý shyǵyp qaldy ma. Sodan qoryqqanynan sýǵa sekirip ketti me degen jaǵdailardy qarastyrdyq», - deidi Erik Sarybaev.
Al, izdestirý-qutqarý jumystaryna TJM Almaty qalasyndaǵy RJQJ-ǵy, Shymkent qalasy TJD, «Qazaviaqutqarý» AQ, Túrkistan oblysynyń PD, «Sairam-Ógem» memlekettik ulttyq tabiǵi parkiniń, eriktiler, Ózbekstan Respýblikasy TJM, QR UQK Tólebi shekara qyzmeti, QR UU 6506 áskeri bóliminiń qyzmetkerleri jumyldyrylǵan.
