Almaty oblysyndaǵy Ile Alataýy sulý tabiǵatynyń aiasynda Medeýden bastap Shymbulaq - Tabaǵan - Aqbulaq jolymen jaiaý 8 shaqyrym júrip óttik. 70 shaqty adamnan turatyn top, ishinde jýrnalister, qoǵam qairatkerleri, tanymal sportshylar men ártister, biznesmender men memlekettik qyzmetkerler - bári de jaiaý júrýdi jaqsy kóretinder, olarǵa taýdaǵy soqpaq qiynǵa túsken joq. VeloFriends qory uiymdastyrǵan marshrýtpen sergek júrip ótip, ǵanibet aldyq.
Topqa jinalǵan adamdarmen jol boiy áńgimelesip, pikir bólistik. Jaiaý júretin soqpaqtardyń jaǵdaiyn, ekotýrizmdi damytý úshin qajet sharalardy talqyladyq, onyń álemdegi damý deńgeiiniń joǵary ekenin jáne belsendi túrde nasihattalatynyn tilge tiek ettik. Sebebi, ekotýrizm ekonomikaǵa mýltiplikativti áser beredi. Qarjylai túsimder ekonomikalyq nátijemen qatar ekologiiany saqtaý jáne qorǵaýǵa jumsalyp, óte tabysty simbioz bolady.
Marshrýt boiynda baiqaǵanymyz: jol silteitin belgilerdiń, oryndyqtardyń joǵy, jolǵa shyqqandar adasyp ketpeýine, sharshasa demalýyna jaǵdai jasalýy qajet.
Meniń jeke pikirim: qazirgi tańda taýda jańa demalys jáne qonaq úilerin salýdyń qajeti joq, onyń ornyna jańa joldar salyp, burynnan barlaryn bailanystyrý kerek. Mysaly, Talǵar aýdanynda Shymbulaq pen Aqbulaqty aspaly jolmen bailanystyrsa, tamasha bolar edi. Elestetip kórińizdershi, dostarym. Qysy-jazy jumys isteitin taý shańǵysy kýrorttar jelisi men jaiaý týristerge arnalǵan yńǵaily jáne qaýipsiz marshrýttar ashylyp, kópshilikke keńinen tarap, tipti sporttan alys adamdar da serýendeýden qashpas edi.
Arystanbek Muhamediulynyń feisbýktegi jazbasynan
