QR Saýda jáne integratsiia ministri Baqyt Sultanov tutynýshylardan jii shaǵym túsetin salalardy atady, dep habarlaidy QazAqparat.
«Tutynýshylar shaǵymdanatyn suraqtar jyldan-jylǵa qaitalanyp keledi. Bul – kommýnaldyq turǵyn úi sharýashylyǵy, bólshek saýda, meditsina, týrizm, kólik, bailanys salalary.
Ministrlik táýelsiz uiymdardy tarta otyryp, tutynýshylardyń quqyqtaryn qorǵaý máseleleri boiynsha áleýmettik saýalnama júrgizgen. Saýalnamanyń nátijeleri boiynsha, el turǵyndarynyń basym narazylyǵy kelesi salalarda kórsetilgen. Meditsinalyq qyzmetter - 46 protsent, bailanys qyzmetteri – 36 protsent, qalalyq qoǵamdyq kólik – 36 protsent», - dedi ol Úkimet otyrysynda.
Vedomstvo basshysynyń aitýynsha, atalǵan salalarda tutynýshylardyń quqyqtaryn qorǵaý boiynsha júieli problemalar qordalanǵan. Osyǵan bailanysty tutynýshylardyń quqyqtaryn qorǵaý júiesin transformatsiialaý bastalǵan kórinedi. Bul reformada tutynýshylardyń quqyqtaryn qorǵaý júiesimen tyǵyz bailanysty tehnikalyq retteý men standarttaý máselelerine basa kóńil bólinip otyr.
«Qazirgi ýaqytta taýarlardyń sapasy men qaýipsizdigine arnalǵan 3 myńǵa jýyq ulttyq standarttar ázirlengen. Alaida olardyń qoldanylýy belgili bir salalarda tómen. Jyldan-jylǵa ótinishter men shaǵymdar sany artyp kele jatqan ekonomika salalaryna erekshe nazar aýdarý qajet. Sonymen qatar, atalǵan salalarda tutynýshylardyń taýarlar men qyzmetterdiń sapasy, qaýipsizdigi boiynsha qanaǵattanýyn qamtamasyz etý úshin jańa ulttyq standarttardy ázirleý jáne qoldanystaǵy ulttyq standarttardy ózektendirý qajet. Salalyq memlekettik organdar normativtik-quqyqtyq aktilerde ulttyq standarttarǵa silteme paidalaný qajet. Bul – tutynýshylardyń quqyqtaryn qorǵaýdy qamtamasyz etetin mańyzdy aspekt», - dedi ministr.
