Shyǵys Qazaqstan oblysynyń ákimi Danial Ahmetovtiń shaqyrýymen koronavirýs infektsiiasyn emdeýge meditsinalyq kómek kórsetip, keńes berý úshin Óskemen qalasyna Tatarstan respýblikasynan 12 dáriger keldi, dep habarlaidy "Ult aqparat" oblystyq aqparat ortalyǵyna silteme jasap.
Shyǵysqazaqstandyq dárigerlerge Reseiden kelgen anesteziolog-reanimatolog, rentgenolog, pýlmonolog, infektsiialyq gospitaldiń dárigerleri men qyzmetkerleri kómektesedi. Dárigerler tobyn Tatarstan Respýblikalyq klinikalyq aýrýhanasy bas dárigeriniń meditsinalyq qyzmet kórsetý jónindegi birinshi orynbasary Marsel Minnýlin basqardy.
«Bul sapar – biz úshin eki el dárigerleriniń arasynda tájiribe almasý ǵana emes, sonymen qatar koronavirýsty emdeýde bir-birimizge kómek kórsetý. Koronavirýs – durys júrgizilýi tiis satylyq aýrý. Virýstyń «satylyq sipaty» bar bolǵandyqtan, patsient jaǵdaiynyń nasharlaityn kezeńderi bolady. Eń bastysy – bul kúnderi durys áreket etip, naýqasqa qajetti preparattar engizý, apparatqa durys qosý. Bul áreketter oń nátijesin beredi», - dep atap ótti Minýllin.
Eske sala ketsek, Shyǵys Qazaqstan oblysynyń ákimi Danial Ahmetov Tatarstannan mamandardy tartý úshin Tatarstan prezidenti Rýstam Minnihanovpen kelissózder júrgizdi.
Atap óteiik, oblysta tósek-oryn qoryn qajetti jabdyqtarmen jabdyqtaý úshin aýqymdy jumystar júrgizilýde. Búginde mundaǵy ókpeni jasandy jeldetýdiń (ÓJJ) 196 apparaty, 57 tsifrlyq rentgen-apparatyna qosymsha ókpeni jasandy jeldetýdiń 50 apparaty, 10 rentgen-apparaty satyp alynǵan. Sondai-aq 200 monitor, 200 infýzomat, úsh EKMO, 178 pýlsoksimetr, 12 ÓJJ, sonyń ishinde balalarǵa arnalǵan ÓJJ eki apparaty, bir kompiýterlik tomograf satyp alý josparlanǵan. Sondai-aq, jedel járdem avtomobilderiniń parkin 216 kólikke kóbeitý jospary bar.
