«QazMunaiGaz» jáne «Tatneft» ózara túsinistik týraly memorandýmdy bekitti, dep habarlaidy "Ult aqparat".
Aita keteiik, «QazMunaiGaz» UK AQ basqarma tóraǵasy Alik Aidarbaev pen QMG delegatsiiasy Tatarstannyń Qazan qalasyna jumys saparymen bardy.
«Shildeniń 10-y kúni «Saýda-ekonomikalyq, ǵylymi-tehnikalyq jáne mádeni yntymaqtastyqtyń qaǵidattary týraly» úkimetaralyq kelisimniń aiasynda «Samuryq-Qazyna» AQ basqarma tóraǵasy Ahmetjan Esimov pen QMG basshysy Alik Aidarbaev Tatarstan Respýblikasynyń Prezidenti Rýstam Minnihanovpen kezdesti. Kezdesý barysynda taraptar munai-gaz salasynda yntymaqtastyqtyń jańa kezeńin bastaýǵa ynta bildirdi. Atap aitqanda, geologiialyq barlaý jumystary, munai jáne gaz himiiasy, tehnikalyq yntymaqtastyq jáne tsifrlandyrý máseleleri boiynsha Tatarstan Respýblikasynyń kásiporyndary men QMG arasyndaǵy ózara is-qimyl múmkindikteri talqylandy», - delingen QMG baspasóz qyzmeti málimetinde.
Sol kúni «QazMunaiGaz» UK AQ jáne «Tatneft» JAQ arasynda ózara túsinistik týraly memorandýmǵa qol qoiyldy. Qujatta Qazaqstan men Resei aýmaǵynda geologiialyq zertteý jáne birlesken geologiialyq barlaý jumystaryn júrgizý; munai óndirýdiń jańa tehnologiialaryn engizý jáne óndiristi tsifrlandyrý boiynsha tájiribe almasý salasyndaǵy yntymaqtastyqtyń boljamdy baǵyttary aiqyndalǵan.
QMG basshysy Alik Aidarbaev Tatneft jáne QazMunaiGaz kompaniialaryn tehnikalyq aqparatpen almasý jáne mamandar oqytý salasynda uzaq jylǵy berik qarym-qatynastar bailanystyratynyn atap aitty. «Memorandýmǵa qol qoiý arqyly biz birlesken dańǵyl joldyń jańa kezeńine jol ashatynymyzǵa senimdimin. Munai-gazy bar Kaspii mańy oipatyn igerý máselesi iri halyqaralyq munai kompaniialary úshin úlken qyzyǵýshylyq týdyryp otyr Tatarstannyń kompaniialary osy protseske belsendi qatysa alady», - dedi ol.
Taraptar Qazan qalasyndaǵy kezdesý munai-gaz salasynyń qazirgi syn-tegeýirinderin talqylaýǵa arnalǵan alań ǵana emes, sondai-aq yntymaqtastyqtyń jańa ári ózara tiimdi baǵyttaryn anyqtaýdyń keremet múmkindigi ekenin atap ótti.
