Jaiyq ózeniniń tasyp, sýdyń kóterilýine bailanysty jeti han jerlengen Saraishyqty sýdan qorǵaý jumysy ýaqytsha toqtatyldy.
Jaǵany bekitýmen ainalysyp jatqan bas merdiger "AIS-Astana" kompaniiasynyń ókili Asqar Tólenovtiń aitýynsha, jumystyń ýaqytsha toqtaityny áýel basta belgili bolǵan, sondyqtan bul kidiris 2018 jyly aiaqtalýy kerek jobanyń uzaqtyǵyna áser etpeidi. Ol jumystyń úsh kún buryn toqtaǵanyn aitty.
Sý resýrstaryn paidalanýdy retteý jáne qorǵaý jónindegi Jaiyq-Kaspii basseindik inspektsiiasynyń basshysy Ǵalidolla Ázidýllinniń aitýynsha, búgin Jaiyqtaǵy sý deńgeii 365 santimetr kóterilip, 672 santimetrge jetti. Al aimaqtaǵy qaýipti deńgei - 850 santimetr. Ǵalidolla Ázidýllin sýdyń bul qaýipti kórsetkishke jetpeitinin boljap, tilsiz jaýdyń maýsym aiynyń basynda qaita bastaýy múmkin ekenin aitty.
Al, bas merdiger kompaniia ókili barlyq qaýipsizdik sharalarynyń jasalǵanyn rastady.
"Jumysty toqtatpas buryn jaǵaǵa topyraq salynǵan qapshyqtardy tizip qoidyq. Buny tolqynnyń jarǵa soǵýyn barynsha báseńdetý úshin jasadyq", - deidi ol. Ókildiń aitýynsha, sý qaitqan soń mamandar qaita iske kirisedi.
Asqar Tólenov tiisti 6000 sharshy metr betonnyń úshten biriniń quiylyp úlgergendigin jetkizdi.
Aita ketelik, byltyr Atyraý oblysynyń ákimdigi 1,5 milliard teńge qarastyryp, kóne shahardy shaiyp bara jatqan Jaiyq ózeniniń jaǵasyn bekitýdi bastady. Odan keiin Mádeniet jáne sport ministrligi ejelgi qalany qalpyna keltirý úshin taǵy 100 million teńge bóletinin málimdedi. Saraishyq qalasyn týristik ortalyqqa ainaldyrý úshin kásipkerlerdi tartý josparlanyp otyr.
Kóne shahar Atyraý qalasynan 45 shaqyrym jerde, Jaiyq ózeniniń jaǵasynda ornalasqan. Altyn orda handyǵynyń saiasi, ekonomikalyq ortalyqtarynyń biri bolǵan qala Qasym hannyń tusynda Qazaq handyǵynyń astanasy atandy. Jibek jolynyń boiynda turǵan munda 7 han jerlengen. Olar: Móńke, Toqtaǵý, Jánibek, Ámir Oqas, Qasym han, Shih Mamai jáne Júsip handar.
Baian Januzaqova
