Búgin Qazaqstan Respýblikasy premer-ministriniń orynbasary Imanǵali Tasmaǵambetov Almaty qalasyndaǵy Alash qairatkeri, ǵulama ǵalym Ahmet Baitursynulynyń mýzei úiinde arnaiy bardy, - dep habarlaidy "Ult aqparat" kaz.tengrinews.kz portalyna silteme jasap.
Tasmaǵambetov tarih jáne mádeniet eskertkishi sanalatyn mýzei úiiniń jyldar boiy qordalanǵan máseleleriniń sheshilýine muryndyq bolmaq.
Ahmet Baitursynuly mýzei úiiniń direktory Raihan Sahybekqyzy vitse-premer Imanǵali Tasmaǵambetovti mýzei jumysymen jáne aqynnyń jádigerlerimen tanystyra otyryp, túitkildi máselelerdiń bar ekenin jetkizdi.
Vitse-premer óz kezeginde alash ziialylarynyń qundy muralaryn jinaqtap, saqtaýǵa kelgende aianbai eńbek etý qajet ekenin aita otyra, osy dúnielerdiń qundylyǵyna da erekshe toqtaldy.
"1934-1937 jyldary aqyn turǵan osynaý kieli shańyraq - tarih pen taǵylymnyń ordasy. Bul úidiń árbir kirpishi men buryshy Ahańnyń qiyn da qasiretti taǵdyrynan syr shertedi. Sondyqtan, biz bul tarihi eskertkishti saqtaýǵa, onyń bilim men ǵylymnyń, tálim men tárbieniń ordasy retinde damytýǵa tiispiz", - dedi Imanǵali Tasmaǵambetov.
Úkimet tarapynan qairatkerdiń ǵylymi eńbekterin zerdeleýdi jetildirý maqsatynda QR premer-ministriniń orynbasary Imanǵali Tasmaǵambetov mýzei ulttyq mártebesin berý, Ahmet Baitursynuly shyǵarmalarynyń 10 tomdyǵyn shyǵarý jáne derekti film túsirý jóninde tapsyrma berdi. Qoiylǵan mindetterdi júzege asyrý úshin kelesi aptada Astanada arnaiy keńes ótkizilmek.
Aita keteiik, 1934-1937 jyldar aralyǵynda Ahmet Baitursynov turǵan úi mýzei retinde 1998 jyly aqynnyń 125 jyldyq mereitoiy qarsańynda resmi túrde ashylǵan. Sonymen qatar, biyl Alash qozǵalysynyń qurylǵanyna 100 jyl tolady.
.jpeg)