Túrkistan oblysy Saryaǵash aýdanynda tasqyn sý saldarynan Baǵys aýylyna baratyn jalǵyz jol jaramsyz kúige tústi. Qazir oblystyq mańyzy bar jol qorshalyp, júrýge tyiym salyndy, dep habarlaidy QazAqparat.
Oblystyq ákimdiktiń málimetinshe, Qazyǵurt aýdanyndaǵy apatqa qatysty jaǵdai turaqtala bastady. Eki aýdanda nóser jaýynnyń saldarynan 7 aýyl okrýginiń 11 eldi mekeninde úiler men qora-qopsyǵa sý kirgen bolatyn. Sýda ólgen maldardyń sany 370-ke jetken. Túni boiy TJ qyzmetkerleri sý kirgen úilerde motopompa arqyly sý shyǵarý jumystaryn júrgizdi.
Aýyl jastarynan qurylǵan eriktiler turǵyndarǵa kómek kórsetip jatyr. Qazyǵurt aýdanyndaǵy 4 eldi mekenge qol ushyn berý úshin óńirdiń ár aýmaǵynan jáne Shymkent qalasynan 100-den astam erikti jas jinaldy. Olar sý basqan turǵyn úilerdiń aýlasy men qora-jailardy, kóshelerdi lai-batpaqtardan tazalaý jumystaryna atsalysýda. Atap aitqanda Túrkistan men Arys qalasy, Keles, Tólebi, Saryaǵash, Maqtaaral, Sairam aýdandary, sondai-aq Shymkent qalasynyń eriktileri aýyl turǵyndaryna kómektesip jatyr.
