Foto: parlam.kz
Májilis depýtaty Rinat Zaiytov sý tasyǵan aimaqtardyń turǵyndaryna ýaqytsha nesielik kanikýldardy qarastyrýdy usyndy, dep habarlaidy «Ult aqparat» inbusiness.kz-ke silteme jasap.
"Tosynnan kelgen topan sýdy qansha jerden tabiǵi qubylys desek te, apatqa kináli adami salǵyrttyqtar da bar. Dálelimen aitsaq, Atyraý oblysy men Qulsary qalasynyń mańynan zańsyz salynǵan sý bógetteri, jergilikti biliktiń kóktemgi sý tasqynyna álsiz ázirlengeni, syn saǵatta abdyraǵan jurttyń áreketin úilestire almaýy da osyndai saldarǵa ákelip soqty. Jergilikti bilik pen jaýapty ministrlikter oǵan deiin dabyl qaqqan áriptesterimniń depýtattyq saýaldaryna bei-jái qaraǵany da bul apattyń bir sebebi deýge ábden bolady. "Bóreneden attaimyz" dep esep berip, sirińkege súrine beretin memlekettik organdardyń shalaǵailyǵy jaýapqa tartpasa jalǵasa beredi ǵoi", - dedi májilismen depýtattyq saýalynda.
Prezident aitqandai, jaýapkershilik alýdan qashyp, jumysty bir-birine siltep otyratyn qyzmetkerler men jergilikti iri kompaniialar áreketteri jazalanýy tiis, dep jalǵastyrdy ol.
"Ekinshiden, apat saldarynan zardap shekken halyq óz shyǵyndarynyń qalai eseptelip, qalai óteletinin áli de tolyq bilmeidi, óitkeni, sharalardyń naqty algoritmi jasalmaǵan, komissiia qalai qurylyp, qalai jumys jasaityny jaily halyqqa durys habarlanbaǵan. Sol sebepten komissiia jumysyn jeńildetip, halyqpen tikelei bailanystyrý maqsatynda onyń quramyna el senimine ie bolǵan jergilikti belsendi azamattardy qosý kerek dep esepteimiz", - dedi Májilis depýtaty Rinat Zaiytov.
Májilismen apat bolǵan aimaqtardyń turǵyndaryna ýaqytsha nesielik kanikýldardy jan-jaqty qarastyrýdy, baspanasynan aiyrylǵan azamattardy ońtaily ornalastyrýdy jedeldetýdi surady.
