Foto: Úkimettiń baspasóz qyzmeti
Tótenshe jaǵdailar vitse-ministri Baýyrjan Syzdyqov Úkimet otyrysynan keiin ótken baspasóz konferentsiiada jazyq daladan tasqyn qaýpi tónedi dep kútpegenderin aitty, - dep habarlaidy «Ult aqparat» Kazinform-ǵa silteme jasap.
Brifing kezinde BAQ ókili Tótenshe jaǵdailar ministrligi tasqynǵa nege taǵy daiyn bolmai shyqqanyn suraǵan. Baýyrjan Syzdyqov ár jaǵdaiǵa der kezinde den qoidyq dep esepteitinin aitty.
«11 óńirdiń 46 eldi mekeninde tasqynnyń aldy alyndy. Túsinip tursyz ba? Sý alǵan basqa 5 oblys týraly aitsaq, baiqaǵan bolsańyzdar, sý ózenderden emes jazyqtan kelip jatyr. Shynymyzdy aitsaq, sý biz kútpegen jaqtan keldi. Iaǵni, sý daladan keldi. Baiqaǵan bolsańyz, keiingi 30 jylda sýdyń artýy daladan týyndaǵan joq bolatyn. Sondyqtan búgingi tańda «Tasqynǵa qarsy der kezinde den qoidyq dep aita alamyz. 46 eldi mekende sýdyń úilerge kirýin boldyrmadyq», - dedi ol.
Vitse-ministrdiń pikirinshe, jazyqtaǵy qar sýyn tasqynǵa qarsy daiyndyq kezinde esepke alý halyqaralyq tájiribede de joq.
«Meni durys túsinbegen shyǵarsyz. Taǵy da qaitalap aitqym keledi, osyǵan deiin bolǵan tasqyn jaǵdailary retteletin ózendermen bailanysty tirkeldi. Iaǵni, sý qoimalary men gidrotehnikalyq ǵimarattar bar aýmaqtarda oryn alǵan. Al daladan aǵyp kelip jatqan sýdyń ózendermen qatysy joq. Iaǵni, qardyń sýy tutastai daladan kelip jatyr. Búgingi tańda daladan keletin qardyń sýy eshbir elde eskerilmeidi. Túsinip tursyz ba? Ózenderden, sý qoimalarynan, bógenderden keletin sý ǵana eskeriledi. Osyny túsiný kerek», - dedi Baýyrjan Syzdyqov.
