6 aqpan kúni Túrki mádenieti jáne murasy qorynyń uiymdastyrýymen jáne Túrki Akademiiasynyń qoldaýymen akademik Darhan Qydyráliniń «Tasqa jazylǵan tarih» atty kitabynyń ázerbaijan, túrik jáne qyrǵyz tilderindegi basylymdarynyń, sonymen qatar orys tilinde jaryq kórgen «Tiýrkskii mir: cherez prizmý istorii», túrik tilinde shyqqan «Kod adi Türkistan: Mustafa Çokay» derekti-ǵumyrnamalyq kitaptarynyń tusaýkeser rásimi ótti, dep habarlaidy Ult.kz.
Astana qalasyndaǵy Qazaqstan Respýblikasynyń Ulttyq akademiialyq kitaphanasynda ótken alqaly jiynǵa Túrki mádenieti jáne murasy qorynyń prezidenti Aqtoty Raiymqulova, Ázerbaijan Respýblikasynyń mádeniet ministri Adil Karimli, Qyrǵyz Respýblikasy Prezidentiniń keńesshisi Aslan Koichiev, Qazaqstan Respýblikasy Prezidentiniń keńesshisi Baýyrjan Omarov, Aziia keńesiniń bas hatshysy Qairat Sarybai, Qyrǵyzstan, Majarstan, Túrkiia, Túrikmenstan, Ózbekstan Respýblikalarynyń Tótenshe jáne ókiletti elshileri, QR Prezidenti Ákimshiliginiń, Syrtqy ister ministrliginiń, Ǵylym jáne joǵarǵy bilim ministrliginiń, Mádeniet jáne aqparat ministrliginiń, TURKSOY halyqaralyq uiymynyń ókilderi, QR Parlamenti Senaty men Májilisiniń birqatar depýtattary, memleket jáne qoǵam qairatkerleri, ǵalymdar men ziialy qaýym ókilderi qatysty.
Jiynda kirispe sózimen ashqan Túrki mádenieti jáne murasy qorynyń prezidenti Aqtoty Raiymqulova akademik Darhan Qýandyqulynyń túrki dúniesine ortaq bai murany zerttep-zerdeleý, saqtaý isterine jáne baýyrlastyq bailanystardy nyǵaitýǵa qosqan zor úlesine toqtaldy.
Sonymen birge basqosýda sóz alǵan memleket jáne qoǵam qairatkeri Myrzatai Joldasbekov, Ázerbaijan Respýblikasynyń mádeniet ministri Adil Karimli, Qyrǵyz Respýblikasy Prezidentiniń keńesshisi Aslan Koichiev, Aziia keńesiniń bas hatshysy Qairat Sarybai, memleket jáne qoǵam qairatkeri Ádil Ahmetov, Qazaqstan Respýblikasy Prezidentiniń keńesshisi Baýyrjan Omarov, L.N. Gýmilev atyndaǵy Eýraziia ulttyq ýniversitetiniń rektory Erlan Sydyqov, TÚRKSOI uiymy Bas hatshysynyń Qazaqstandaǵy keńesshisi, akademik Kárimbek Qurmanaliev, Nazarbaev ýniversitetiniń professory Iýlai Shamiloǵlý, belgili baspager Shyńǵys Muqan oqyrmanǵa jol tartqan jańa kitaptar týraly oramdy oilaryn ortaǵa salyp, paiymdy pikirlerimen bólisti.
Túrki mádenieti jáne murasy qory jaryqqa shyǵarǵan akademik D.Qydyráliniń «Daşa yazilan tarih» (ázerbaijan tilinde) kitabyna avtordyń baiyrǵy bahadúr babalar tarihynyń tereńinen syr tartatyn, jalpy túrkologiiadaǵy alýan taqyrypty arqaý etken ǵylymi jáne ǵylymi-tanymdyq maqalalary toptastyrylǵan.
Osy kitaptyń qyrǵyz tilindegi basylymy sanalatyn «Tashka jazylgan taryh» kitaby da túbir bir túrki jurtynyń tarihyn qazirgi zaman turǵysynan zerdelep, tuǵyrly tulǵalarymyzdy jan-jaqty tani túsýge jol ashatyn, ǵylymi jańalyǵy mol eńbek. Aita ketý kerek, bul basylym Qyrǵyz Respýblikasy Prezidenti janyndaǵy Tarih ǵylymyn damytý komissiiasynyń sheshimimen basylyp shyqqan alǵashqy kitap.
Sonymen qatar, eńbektiń Túrki Akademiiasy jáne TÚRKSOI halyqaralyq uiymynyń qoldaýymen «Büyük Bozkir: Taşlara Yazilan Tarih» degen atpen jaryq kórgen túrik tilindegi nusqasy da kieli Ergeneqon, Ótúken jerlerinen tamyr tartatyn ashina dáýirinen bastap, Altyn Orda zamanyna deiingi ortaq tarihymyzdy qamtyǵan bai mazmunymen erekshelenedi.
Buǵan qosa, oqyrman nazaryna «Mazmundama» baspasy shyǵaryp usynyp otyrǵan «Tiýrkskii mir: cherez prizmý istorii» atty kitaby orys tildi oqyrmanǵa túrki tarihy men tulǵalary týraly tanym-túsinikterin aiqyndai túsýine múmkindik beretinimen mańyzdy.
Akademik D.Qydyráliniń atalǵan jiynda tanystyrylǵan «Kod adi Türkistan: Mustafa Çokay» atty derekti ǵumyrbaiandyq kitaby buǵan deiin de birneshe tilde jaryq kórip, oqyrman tarapynan óz baǵasyn alǵan týyndy. Bul joly túrik oqyrmandardyń suranysymen Ankaradaǵy «Bengü» baspasynan qaita basylyp shyǵyp otyr.
