Búgin Qazaqstan Respýblikasynyń Prezidenti Nursultan Nazarbaevtyń Ózbekstan Respýblikasyna jasaǵan sapary aiasynda Tashkentte eki el kásipkerleriniń biznes-forýmy ótti. Baýyrlas elderdiń saýda-ekonomikalyq yntymaqtastyǵynyń artýyna múmkindik beretin kezdesýge 500-den astam kásipker qatysty, dep habarlaidy QazAqparat.
Sonymen qatar, Tashkent qalasynda ótken biznes-forým sheńberinde Qazaqstanda óndiriletin ónimderiniń kórmesi ótti.
Ózbekstan astanasynda keshe bastalǵan kórmege 90-ǵa jýyq otandyq kompaniianyń ónimderi qoiylǵan. Qazaqstandyq taýaróndýshiler kórmede tamaq jáne ónerkásip, injenerlik, mashina jasaý, farmatsevtika jáne qurylys zattary men himiia, metallýrgiia, IT salalaryndaǵy 500-den astam ónimin usyndy.
«Ózekspoortalyq» kórme kesheninde ótip jatqan kórmege Ońtústik Qazaqstan oblysynyń birqatar iri kásiporyndarynyń ónimderi qoiyldy. Atap aitqanda, kilem shyǵaratyn «Bal Tekstil» fabrikasynyń, un jáne sút ónimderin óndirýde kóshbasshylardyń qataryndaǵy «Altyn Dán» JShS-nyń, «Shymkent tsement» jáne «Standart tsement» zaýyttarynyń, TMD-da birinshi ashylǵan vakýýmdyq probirkalar men ekijaqty ine shyǵaratyn «EkoFarm Interneshnl» kompaniiasynyń jáne «Himfarm» zaýytynyń, meditsinalyq jabdyqtardyń 17 túrin shyǵaratyn «Marai E7 Group» JShS-nyń ónimderi qoiyldy», - dep málimdedi OQO ákimdiginiń baspasóz qyzmetinen.
Sonymen qosa, kórmede «AtaStroi» qurylys kompaniiasy Saryaǵash aýdanyndaǵy Jibek-Joly shekara beketin jańǵyrtý jobasyn tanystyrdy. Quny 18 mln AQSh dollary bolatyn joba júzege assa, táýligine 30 myń adam emin-erkin eki el shekarasynan óte alady.
OQO ákimdigi men Kásipkerler palatasynyń uiymdastyrýymen Ózbekstan-Qazaqstan biznes-forýmyna Ońtústik Qazaqstan oblysynan óńir basshysy Janseiit Túimebaev bastaǵan 150-den astam adam qatysty. Olardyń qatarynda memlekettik jáne qarjylyq uiymdar ókilderi, kásipkerler bar. Biznes-forým kezinde V2V formatynda kelissózder júrgizilip, ondaǵy qatysýshylar ózara is-áreketter jaqyn bolashaqta óz nátijesin bererine senim bildirdi.
