Tashkentte "Aqsarai" rezidentsiiasynyń aldynda 31 tamyz kúni Ózbekstannyń burynǵy prezidenti Islam Karimovke ornatylǵan eskertkish resmi túrde ashyldy, - dep habarlaidy Azattyqtyń Ózbek redaktsiiasy. "Aqsarai" - Karimovtyń burynǵy jumys rezidentsiiasy. Eskertkish tamyzdyń ortasynda ornatylǵan bolatyn.
Eskertkishtiń saltanatty ashylý rásimine is basyndaǵy prezident Shavkat Mirziiaev, Islam Karimovtyń jesiri Tatiana Karimova, premer-ministr Abdýlla Aripov pen onyń orynbasarlary, úkimet pen parlament ókilderi, qoǵam qairatkerleri qatysty.
Buǵan deiin Ózbekstan biligi Islam Karimovke ornatylatyn eskertkish jobasyna halyqaralyq konkýrs jariialaǵan. Konkýrsqa Ózbekstan, Túrkimenstan, Ýkraina, Ońtústik Koreia, Italiia, Avstriia, Germaniiadan barlyǵy 58 músinshi 68 jobasyn usynyp, sońynda ózbekstandyq músinshi Ilhom Jabborovtyń jobasy tańdap alynǵan.
Islam Karimovtyń eskertkishi Samarqannyń "Registan" alańyna jaqyn "Iýlbarslar hiioboni" ("Jolbarystar skveri") skverine de qoiylǵan. Ol eskertkishtiń biiktigi 5,8 metr, tuǵyrynyń biiktigi – 5,5 metr.
Islam Karimovtiń úshinshi eskertkishin jaqynda Qashqadariia oblysynyń ortalyǵy Qarshy qalasyna qoiady.
Ózbekstannyń alǵashqy prezidenti Islam Karimovtiń qaitys bolǵany 2016 jyly 2 qyrkúiek kúni habarlandy. Ol Ózbekstandy 1989 jyldan beri basqarǵan edi. Karimov elde avtoritarlyq rejim ornatyp, oppozitsiia men táýelsiz basylymdardy joiǵan bolatyn.
