تاشكەنتتە "اقساراي" رەزيدەنتسيياسىنىڭ الدىندا 31 تامىز كٷنٸ ٶزبەكستاننىڭ بۇرىنعى پرەزيدەنتٸ يسلام كاريموۆكە ورناتىلعان ەسكەرتكٸش رەسمي تٷردە اشىلدى, - دەپ حابارلايدى ازاتتىقتىڭ ٶزبەك رەداكتسيياسى. "اقساراي" - كاريموۆتىڭ بۇرىنعى جۇمىس رەزيدەنتسيياسى. ەسكەرتكٸش تامىزدىڭ ورتاسىندا ورناتىلعان بولاتىن.
ەسكەرتكٸشتٸڭ سالتاناتتى اشىلۋ رەسٸمٸنە ٸس باسىنداعى پرەزيدەنت شاۆكات ميرزيياەۆ, يسلام كاريموۆتىڭ جەسٸرٸ تاتيانا كاريموۆا, پرەمەر-مينيستر ابدۋللا اريپوۆ پەن ونىڭ ورىنباسارلارى, ٷكٸمەت پەن پارلامەنت ٶكٸلدەرٸ, قوعام قايراتكەرلەرٸ قاتىستى.
بۇعان دەيٸن ٶزبەكستان بيلٸگٸ يسلام كاريموۆكە ورناتىلاتىن ەسكەرتكٸش جوباسىنا حالىقارالىق كونكۋرس جارييالاعان. كونكۋرسقا ٶزبەكستان, تٷركٸمەنستان, ۋكراينا, وڭتٷستٸك كورەيا, يتالييا, اۆسترييا, گەرمانييادان بارلىعى 58 مٷسٸنشٸ 68 جوباسىن ۇسىنىپ, سوڭىندا ٶزبەكستاندىق مٷسٸنشٸ يلحوم جاببوروۆتىڭ جوباسى تاڭداپ الىنعان.
يسلام كاريموۆتىڭ ەسكەرتكٸشٸ سامارقاننىڭ "رەگيستان" الاڭىنا جاقىن "يۋلبارسلار حييوبوني" ("جولبارىستار سكۆەرٸ") سكۆەرٸنە دە قويىلعان. ول ەسكەرتكٸشتٸڭ بيٸكتٸگٸ 5,8 مەتر, تۇعىرىنىڭ بيٸكتٸگٸ – 5,5 مەتر.
يسلام كاريموۆتٸڭ ٷشٸنشٸ ەسكەرتكٸشٸن جاقىندا قاشقادارييا وبلىسىنىڭ ورتالىعى قارشى قالاسىنا قويادى.
ٶزبەكستاننىڭ العاشقى پرەزيدەنتٸ يسلام كاريموۆتٸڭ قايتىس بولعانى 2016 جىلى 2 قىركٷيەك كٷنٸ حابارلاندى. ول ٶزبەكستاندى 1989 جىلدان بەرٸ باسقارعان ەدٸ. كاريموۆ ەلدە اۆتوريتارلىق رەجيم ورناتىپ, وپپوزيتسييا مەن تەۋەلسٸز باسىلىمداردى جويعان بولاتىن.
