Qazaqstandaǵy bankter tártipsizdikter kezinde zardap shekkenderdiń nesiesin 3 ai keiinge shegeredi. Bul týraly QR Qarjy naryǵyn retteý jáne damytý agenttigi Qarjylyq qyzmetterdi tutynýshylardyń quqyqtaryn qorǵaý departamentiniń direktory Aleksandr Terentev aityp berdi, dep habarlaidy QazAqparat.
«Elimizde TJ engizý saldarynan kóptegen kásipkerler, qarapaiym azamattar kommertsiialyq qyzmetin nemese jumysyn toqtatýǵa májbúr boldy. Osyǵan bailanysty olardyń tabysy tómendedi, kásipkerlik sýbektilerine aitarlyqtai materialdyq zalal keldi, endi búlingen múlikti jóndeýge, biznestiń qalypty rejimin qaitarýǵa ýaqyt qajet. Osyǵan bailanysty bizdiń agenttik Prezidenttiń tapsyrmasy boiynsha dereý banktermen, mikroqarjy uiymdarymen jumys júrgizdi jáne barlyq kreditorlar úshin qaryz ben mikrokreditterdiń barlyq túrleri boiynsha keiinge qaldyrýdyń biryńǵai tártibin qabyldady. Keiinge shegerý barlyq zardap shekken zańdy jáne jeke tulǵalarǵa TJ engizilgen kúnnen bastap úsh aiǵa beriledi», - dedi Aleksandr Terentev Ortalyq kommýnikatsiialar qyzmetinde ótken baspasóz máslihatynda.
Spikerdiń aitýynsha, qaryzdar men mikrokreditter boiynsha keiinge shegerý kezeńinde barlyq bankter jáne mikroqarjy uiymdary turaqsyzdyq aiybynyń, aiyppuldyń, ósimpuldyń somasyn eseptemeidi.
Odan bólek, kreditterdi óteý merzimin ótkizip alý jáne keiinge shegerý qaryz alýshynyń kredittik tarihyn nasharlatýǵa, ol týraly kredittik biýroǵa teris aqparat berýge negiz bolmaidy.
«Keiinge shegerýdi alý úshin qaryz tóleýshi kez kelgen qoljetimdi bailanys tásilimen nemese kreditordyń bólimshesine jeke baryp, erkin túrde ótinish jazýy qajet. Bul óte ikemdi jumys, munda 2020-2021 jyldary berilgen keiinge shegerý joldary paidalanyldy», - dedi Aleksandr Terentev.
